Brief aan Manèe op haar 21e verjaarsdag

Manée…. “lieflik, goddelik”

Ma 20180413_210053

Dis wat jou naam beteken, my pragtige dogter. Môre verjaar jy en dan word jy 21. WOW!! Om te dink, 21 jaar gelede was jy ‘n bondel vreugde wat ek in my arms vasgehou het.

Elke keer wanneer ek hier vir jou of vir jou sussie skryf, dan voel dit “long overdue”. Ek het so baie om te sê (positiewe goed, nie negatiewe goed nie), maar elke ongeskrewe en ongesproke woord wat oor die afgelope sewe jaar versamel het…. Hier is net eenvoudig nie genoeg plek daarvoor nie.

Eerstens wil ek hê jy moet weet dat ek jou oneindig liefhet. Dit sal nooit verander nie, maak nie saak wat gebeur nie. Ek wil hê jy moet die waarheid weet. Moet nóóit die leuen glo dat ek jou nie wou gehad het nie. Ek noem dit vir jou want dit is dinge wat jy teen my hou, maar niemand sê vir jou die waarheid nie: dat jy soveel vreugde in my lewe en in die lewens van ander toegevoeg het. Ek is oneindig dankbaar vir jou; jy is so geliefd!! En DIT is die reine waarheid.

As jy eendag self ‘n mamma word, sal jy self verstaan hoe dit voel wanneer ‘n mamma so lief is vir haar kinders dat haar hart wil ontplof! ‘n Liefde wat maak dat ‘n ma enige tyd haar lewe vir haar dogters sal gee. Die onvoorwaardelike liefde wat ‘n ma vir haar kinders het is werklikwaar onparallel aan enige ander soort liefde. Niks op aarde is meer belangrik as die verhouding tussen ‘n ma en haar dogters nie. Ek sê “op aarde” want natuurlik is ons verhouding met die Here die heel, heel belangrikste. Maar ‘n ma se verhouding met haar dogters is besonders. Ek weet, want ek het ook ‘n ma. Ons het nie altyd die wonderlikste verhouding gehad nie; en ek het haar al haar grys hare gegee!! Maar ek kan nie my lewe sonder haar indink nie: my grootste aanhanger, my engel-moedertjie wat haar knieë vir haar dogter en kleindogters deurbid; die persoon wie vir my die liefste in die wêreld is…. Soos ek vir julle is.

Manée, jy is nou groot. Ek het onlangs verneem dat jy in die buiteland iewers werk. “Jou kind werk in die buiteland en sy het nie eers die moeite gedoen om jou te sê nie!” was die boodskap; want ek “is dit nie werd nie.” En dis fine. Moenie vir een oomblik dink ek is kwaad vir jou nie. Ek hoef ook nie te wonder oor jou of bekommerd te wees oor jou nie, want ek wéét dat die Hand van my Here oor jou is – en Hy is waardig! Ek glo nie daar is iemand meer trots op jou as jou eie ma nie, want jy is in staat om jou eie besluite te kan neem; dat ander dit nie vir jou neem nie. Ek is in ekstase dat jy keuses maak wat vir JOU goed is, en nie vir ander nie. Selfs al beteken dit dat jy dink ek is nie nou, op hierdie stadium van jou lewe, goed vir jou nie. Dis JOU keuse, my kind; en ek respekteer dit. En ja, jy gaan foute langs die pad maak. Ons almal doen. Niemand is perfek nie, niemand hoef te wees nie. Dis al hoe ons leer: uit die foute wat ons maak. Leer van jou eie ma die volgende belangrike les: partykeer maak ons oor en oor en oor dieselfde fout, maar ons leer eventueel – selfs al is dit te laat. Maar elkeen van ons het die ongelooflike kapasiteit om te verander, ons moet net eers erken dit wat in onsself is wat moet verander.

Anywhoooooo….. die feit dat jy oorsee gaan werk het, gaan nie oor my of enige iemand anders nie. Dit gaan oor JOU en die pad wat jy besig is om vir jouself oop te kap. Dit gaan oor JOU onafhanklikheid; en dis wonderlik dat jy die geleentheid gegryp het om dit te kan doen. Carpe diem!!

Dis okei as jy ‘n blinde oog en ‘n dowe oor wil gooi. Jou ma verstaan baie beter as wat jy dink; en ek sal jou nooit verwyt nie. Baie kinders gaan deur die lewe en blameer hulle ouers vir alles wat verkeerd loop in hulle lewens. Ek weet, ek het ook my ouers blameer vir my tekortkominge…. Maar iewers op ‘n punt in ‘n mens se lewe moet jy daaroor kom, en jy moet leer om te vergewe en te vergeet.

Jy sê jy het aanbeweeg. Welgedaan, my kind!! Jy is ‘n dapper en sterk jong vrou; niks kon jou nog ooit onderkry nie, en niks sal ook nie. Ek sal altyd vir jou lief wees en ongelooflik trots wees op jou: op jou individualiteit; op dit wat jy bereik in jou lewe. Ek het jou gevier die dag toe jy gebore was, en ek sal nooit ophou om jou te vier nie. Jy is Godgegewe!!

Lekker verjaar, my kind. Wees veilig. Ek los jou met die woorde van Paulus in 2 Tessalonisense 2:16-17: “Mag ons Here Jesus Christus en God ons Vader – Hy wat ons liefgehad het en wat ons deur sy onverdiende goedheid ‘n ewige troos en ‘n goeie vooruitsig gegee het – mag Hy self [jou] hart vertroos en [jou] sterk maak in elke goeie daad en woord.”

Love you to the moon and back.

Jou ma xxx

IMG-20180413-WA0001

 

Advertisements

‘n Brief aan elke vrou, van Leandri

Ek wil graag ‘n brief met julle deel wat ‘n gewese skoolmaat van Anike geskryf het. Dit praat regtig met ‘n mens se hart. Ek hoop in die onmoontlikheid van baie dinge, dat my dogters dit ook te lees sal kry want ek weet dit sal vir hulle ook baie beteken.

Ma Sel 20171022_064248

Leandri (links) en Anike. Hierdie twee was soos Dawid en Jonatan. Dinamiese vriende! Leandri het in ons lewens ingestap toe sy en Anike maats geraak het op laerskool. Dierbare kind wat baie diep in ons harte gekruip het. Haar vriendskap met Anike was een van daardie wat ‘n ouer se hart bly gemaak het. Selfstandige, goed opgevoede kind. As daar nou een kind was saam met wie ek my kind vertrou het, dan was dit Leandri gewees. My hart was gebreek vir haar toe Anike weggegaan het en hulle kontak verloor het. Hoe bitter onregverdig, dat met die vervreemding, my dogters se vriendskappe ook moes skipbreuk ly. Hulle het dit nie verdien nie. Nie my dogters nie en ook nie die maats wat agtergebly het en kontak verloor het nie.

Nietemin, deur die jare het Leandri haar kop hoog gehou en as jong dogter bly groei. Vanjaar is sy in matriek en hoofdogter van Hoërskool Adamantia in Kimberley. Op Vrydag 2 Maart het die skool vir Wêreldbiddag vir Vroue ‘n dag vir dames aangebied. Leandri was een van die sprekers en sy ‘n brief geskryf wat nie net ‘n paar leerlinge nie, maar ook ‘n paar dames in trane gehad het.

Leandri, ek wil net vir jou sê dankie. Dankie vir die impak wat jy nie net op Anike se lewe gehad het nie, maar ook op ons s’n. Dankie dat jy deur al die jare gereeld met tannie Susan kontak gehou het. Julle plaaskuiers was haar lewe! Jy besef dit dalk nie, maar jou omgee het haar deur baie moeilike tye gedra. Dankie vir jou vriendskap met Anike. Ek is seker toe jy die brief geskryf het, was die gedagte aan ‘n eens kosbare vriendskap soos ‘n goue draad  ingeweef. Ons wéét, ons verlang ook na haar. Bly altyd spesiaal. Baie liefde, tannie Andorize, tannie Susan en oom Rudolf. X

‘n Brief aan elke vrou, geskryf deur Leandri de Wet.

Daar gaan dae wees wanneer jy jou kop gaan laat sak en jou trane op die vloer sien val. Dit gaan pyn, dit gaan ruk aan die dele van jou hart en siel wat die heel kwesbaarste is. Die dele wat jy gewoonlik vermy en toegebou het. Die dele wat jy die liefste het, en die bangste voor is. Die dele wat liefde dra. Ou liefde, nuwe liefde, verlore liefde.

Daar gaan dae wees wanneer jy jou kroon gaan laat val en nou en dan ‘n dag wat jy jou kroon gaan gooi! Jy gaan dae ervaar wanneer mascarra ‘n mors van tyd was en jou lipstick op natgehuilde tissues sal beland. Jy gaan ook dae hê wat jou favourite jeans nie meer gaan pas nie en jou go-to toppie in jou kas ‘n back-up lap word. Net omdat sekere dinge tydelik is, beteken nie dit was enigsins minder poëties en waardevol nie.

En dan gaan daar ‘n dag kom wat jy besef dis okay. Dis okay om nie elke dag alles bymekaar te hê nie. Dis okay om te val. Dis okay om kwaad te wees en pyn te voel en dis okay om vrae te vra. Hierdie dag bring groei vir jou siel. Hierdie dag bring verandering. Karakter. Hierdie dag bring genesing saam met die seer. Hierdie dag bring die vorm van jou hart.

Aanvaar die lewe met al sy goeie dae, al sy slegter dae en al sy in-betweens. Embrace the glorious mess that you are! Of jy dit nou in designer heels doen en of jy twee verskillende sokkies aan het soos ek… Jy is alles werd! Jy is geluk werd. Jy is liefde werd! Jy is ‘n prins werd. Jy is die held in die storie werd! Jy verdien die wêreld! Jy is ‘n meesterstuk. Jy is vrou. Jy is nodig.

Pas jouself op, mooiste vrou,
Die wêreld is ‘n mooier plek as gevolg van jou ♡

Sterreprag

Sjoe, wat ‘n besige tyd! Busy busy busy! In Kathu vir ‘n kursus, die naweek plaastoe, Saterdag Kimberley toe saam met Ma, en werk tussenin. Mens se liggaam raak moeg, en ek is darem ook nou nie meer gister se kind nie. Liggaamlik en verstandelik raak ‘n mens soms moeg en tam, maar die vrede wat alle verstand te bowe gaan, is blywend…. En ek het dit een aand in Kathu tasbaar ervaar toe ek na ‘n tawwe dag op die bankie buitekant die hotel gaan sit het. Toe ek opkyk, toe sien ek die mooiste sterrehemel raak. Wég die gedagte van moegheid en tamheid. Ek het vir baie lank net stilgesit en gestaar…. En die eerste gedagte wat by my opgekom het:

O Heer my God, as ek in eerbied wonder en al U werke elke dag aanskou. Die son en maan, die aarde, sterre, wolke, hoe U dit elke dag so onderhou. Dan moet ek juig….

God se handewerk gee ‘n mens ‘n ondeurgrondelike blydskap. Daar is nie woorde om dit te beskryf nie. Ek het iewers gelees dat die aandster altyd met miswolke bedek is, en dat dit die lig is wat op die mis skyn, wat dit so mooi laat lyk.

Is dit nie ook waar van ons nie? Soms sak die miswolke ook op ons toe en omvou ons van alle kante, maar wanneer die son van God se liefde oor ons skyn, maak dit nie saak nie want dan verander ons miswolke in sterreprag.

My dogters, julle is ook my sterreprag blydskap en ek bid dat julle soos aand en oggendsterre in hierdie donker wêreld sal skyn.

Is dit nie ‘ n wonderlike gedagte nie, dat my dogters ook dieselfde maan en dieselfde sterrehemel as ek raaksien? Selfs die mense in die Bybel se tyd en die Here Jesus self het na dieselfde sterre gekyk waarna ek en jy ook kyk!

En nog ‘n wonderlike gedagte is dat sterre heeldag skyn. Soos wat hulle snags bo ons koppe verby beweeg, so ook bedags. Ons sien hulle egter eers as dit donker raak….

En hierin lê nog ‘n onbeskryflike wonder, maar dit moet elkeen van ons vir onsself ontdek.

Xxx

20180301_181831

Goeie dinge sal kom

Ek is besig om ou foto’s en kaartjies en goetertjies bymekaar te sit om ‘n collage daarvan op ‘n groot canvas te decoupage. Daar is een spesifieke plastiek lêer waarna ek gesoek het met my dogters se prentjies en briefies en kaartjies in wat ek bymekaar gemaak en gebêre het van kleuterskool se dae af. Ek kon dit nêrens kry nie. Ek het deur elke boks gesoek (my goed staan in bokse gestoor by my ma totdat ek ‘n groter huis kan kry), so dit was ‘n gesoek en ‘n gehuil en ‘n tyd van paniek. Ek kon alles verloor, net nie daardie lêer nie! Daarin is te veel sentiment en kosbare herinneringe…. Prentjies wat my kinders geteken en geverf of ingekleur het, briefies en kaartjies wat hulle vir my geskryf het, gebedjies…. Alles is daarin. Dis my kosbaarste besitting en ek kon nie bekostig om dit te verloor nie.

Ek was in ‘n toestand toe ek nie die lêer kon vind nie, en na ‘n paar weke, net toe ek alle hoop wou laat vaar en maar weer alles terugpak in die bokse, TA DA!! Binne-in ‘n dik kartonlêer ingeglip, daar het dit versteek gelê.

Hier is ‘n les iewers hierin, het ek agterna besef. Goeie dinge sal kom. Goeie dinge gebeur vir dié wat wag. Net toe ek op die punt was om moed op te gee, toe kom dit.

Maar ons moet nooit moed opgee nie, ons moet net leer om geduldig te wees. Wat ons nodig het, sal na ons toe kom wanneer die tyd reg is. Die Here is besig met ons, Hy is besig met ons situasies, en Hy doen nie halwe of afskeepwerk nie.

Maar dis nie maklik om te wag nie. Dis nie soos ‘n skakelaar wat ‘n mens net kan aan of afsit nie. Soms voel dit of jy van ‘n krans wil afspring, of in sak en as te gaan sit, maar ons moet onthou dat alle goeie dinge TYD, GEDULD, en die bereidwilligheid vat om deur alles te werk met God se genadehart vir ons.

Dit voel dalk vir jou of dinge sloer en of niks aan die gebeur is nie, sê Habbakuk, maar wees geduldig. Jy sal sien, kom sal dit kom en niks en niemand sal dit kan terughou nie. Xxx

39c0158c138d379e6f62f9f8cc7d1574--true-quotes-christian-quotes

Gedagtes na die naweek

Oppad terug van Pretoria af. Woensdagmiddag uitgevlieg, ry vandag saam met Riaan se ma-hulle terug. Die pad is lank. Figuurlik gesproke ook, dink ek nou, na ouma Hannetjie se begrafnis Vrydag op Vaalwater in die NG Kerk. Nie my ouma nie, Riaan s’n. Die ouma wat hom grootgemaak het en wie se oogappel hy was. ‘n Relatief groot begrafnis, en ‘n aansienlik groot familie saamtrek…. die Kroch’s, Fourie’s, Stoops…. One big happy family. Dis wat ek die naweek ondervind het en dit was met tye nogal oorweldigend, ek is dit nie gewoond nie. Maar wat ek gesien het was hoe ‘n familie kan saamstaan, saamwerk, saamhuil, saamlag. Daar was nie tyd vir díé buitestaander om mensverskrik te wees nie, ek moes maar inval en inpas anders sou ek in die woer-war verlore raak.

Elke familie het maar sy vrot kol. Sy vlieg in die salf. En soos die sê-ding gaan, jy kan jou vriende kies maar nie jou familie nie. Nie dat ek noodwendig saamstem nie, mens het altyd ‘n keuse wie jy in jou familiekring toelaat.

dea5c4455ebf356c5611cf4b6b8b80f9--bad-family-quotes-quotes-about-family

Wat my geruk het van die begrafnis was twee dinge. Eerste, toe ek verlede week ouma Hannetjie se eulogie geskryf het namens Riaan se ma. Ek het so aan my eie dogters gedink en gewonder, hoe sal die eulogie wees wat hulle vir my op my begrafnis skryf? Sal hulle ooit op my begrafnis wees? Dit was ‘n gedagte wat my hart vasgegryp en angstig gemaak het, want Here, sal ek ooit in vrede kan rus sonder my dogters langs my sterfbed? Dis skrikwekkend, en hartseer, om aan te dink.

Die tweede gedagte was Vrydag na die begrafnis. Ek het aan my ma gedink, en vit haar ‘n whatsapp gestuur en gesê sy moet asb nog 60 jaar vasbyt – want ek weet nie of ek gereed sal wees om haar te ruste te lê nie. Ek weet nie hoe ek dit sal hanteer, en of ek die krag sal hê om dit te kan hanteer nie. Die afskeid, finaliteit, ewigheid. Dis scary.

Maar genoeg van die “heavies”, emosies het mos die neiging om 1000 maal vinniger as jou brein te werk! Môre is ‘n nuwe week met nuwe uitdagings en nuwe dinge. Ons kan uitsien na die dag van môre en kans sien vir die week wat voorlê, want ons is nog sterk en vol lewe. Ons het al die goeie dinge waarmee die Here ons oorlaai om te geniet. Hy gee ons krag om soggens op te staan; om in rus en tevredenheid saans te gaan slaap.

Dis die bril waardeur ek eerder graag wil kyk.

Xxx

 

Geseënde Kersfees

Aan my dogters, waar julle jul ook al mag bevind, dit is my wens en gebed dat julle ‘n geseënde dag gehad het. Julle is elke oomblik in my gedagtes. Mag Jesus Sy vreugde in julle harte laat herleef en julle vul met oorvloedige blydskap en seën. Al is Kersfees nie meer Kersfees sonder julle nie, troos ek my daaraan dat julle gelukkig en gesond is, en dat God elke tree saam met julle is en julle beskut onder Sy ewige vleuels.

Dankie Mams, vir die heerlike kuier en ete vandag. Dit was, soos altyd, uit die boeke! Volgende Kersfees, as die Here ons spaar, vier ons saam Kersfees by jul nuwe woning by die see, jippie!

Vir al my blogmaats wil ek graag ‘n geseënde Kersfees toewens. Baie dankie vir julle pragtige skrywes, wat my deur elke dag en elke bui en al die vrae dra. Julle lê my baie na aan die hart en dit is my gebed dat God se liefde en krag julle sal omvou en deurdring.

kersfeesweb

Xxx

Intensies – maak dit regtig saak?

Tweede op die lys van “5 things to do” is SET YOUR INTENTIONS.

Goeie intensies? Minder goeie intensies? Is daar nie ‘n spreekwoord wat sê die pad hel toe is uitgelê met die beste intensies nie?? As ons fokus op die kragtige, euforiese, magiese, sinkronistiese, mooi van die lewe, sal dit na ons kant toe kom? Ek weet nie, maar ek is hopeloos te sinies vir so ‘n siening. Dit klink te veel na lala land, so kom ons bly realisties.

Is dit die intensies wat saakmaak, of die aksies wat ons neem op daardie intensies? Ons is immers wat ons doen en sê, nie wat ons van plan is om te doen nie, nie waar nie?

So, aan die einde van die dag het ek gesit en net gebreinstorm en vir myself ‘n lysie gemaak. Niks fancy of uitspattig nie, en intensies is nie ‘n once off ding nie. Mens word elke dag met intensies wakker, maar hier is ‘n paar wat ek dink ek onder die top tien van my daaglikse intensies sal plaas:

  1. Wees JOUSELF.
  2. Moenie alles oordink nie.
  3. Wees altyd bereid om jouself te verbeter asook die lewens vir ander makliker te maak.
  4. Moenie so gou moed opgee nie.
  5. GLO GLO GLO alles is moontlik.
  6. Werk hard.
  7. Gee sonder om terug te verwag.
  8. Dans op die musiek wat die lewe vir jou speel, al is dit nie jou smaak of voorkeur nie.
  9. Hou die lied in die hart!
  10. Moet nooit ophou bid en moed opgee met jou dogters nie.

9bd8037580d748648770877480949e68

Phalaenopsis – vir my dogters

Blomme is eintlik so eenvoudig, maar hulle kan soveel vreugde besorg. My blomme laat my altyd beter en gelukkiger voel; hulle is die sonskyn, voedsel, en medisyne van my siel.

Ek het onlangs ‘n Phalaenopsis plant persent gekry. Met die eerste oogopslag het hierdie plant soveel herinneringe teruggebring aan vroeër jare toe my dogters nog in die huis was. Ek was gevul met heimwee, maar tegelykertyd ook met bewondering. Ek het gegaan en intensiewe navorsing gaan doen rondom die Phalaenopsis. As ek maar daai tyd die moeite gedoen het….

Anike was nog op laerskool toe sy eendag vir my vertel het van die Phalaenopsis blom. Sy was mal daaroor en wou ook graag een gehad het. So het ek ‘n paar plante gekoop en in amper elke vertrek een gesit. Die probleem was egter, ek kon dit nooit aan die lewe hou nie. Dit het bly doodgaan. Dan koop ek maar weer, en na ‘n ruk dan dooi dit weer. (Ek kon dan nie eers die goudvis aan die lewe hou nie, dié moes ek ook maar noodgedwonge in die toilet afspoel!)

Niks wou by my aan die lewe bly nie, so ek het na my dogters weg is, nog nie weer ‘n plant of dier aangeskaf nie. Tot onlangs. Terloops, ek weet nóú hoekom die plante (en die goudvis) dit nie gemaak het nie. Hulle was oorvoed, verkeerd versorg, en die toestande was nie vir hulle gunstig nie. Soos met my dogters, was ek hopeloos onkundig.

Ek het uitgevind dat die Phalaenopsis eintlik van die orgidee spesies is en oorspronklik van die tropiese dele van Asië afkomstig is; en dat dit ‘n baie belonende plant kan wees onder die regte groeitoestande. Nie veeleisend nie, hulle vereis bloot net die regte balans tussen humiditeit, temperatuur, water, lig, en beweging van lug. Het jy geweet dat daar sowat 60 van die Phalaenopsis orgidee spesies aangeteken is, maar wat al so breedvoerig gehybridiseerd (kruis-bestuif) is dat daar letterlik duisende soorte Phalaenopsis plante wêreldwyd is? ‘n Mens is nooit te oud om te leer nie!

So, hier is my Phalaenopsis, en soos my dogters is daar ‘n soort mistiek rondom hulle wat hulle uitsonder van ander. Hulle is elegant, uniek, en maklik om te versorg.

Ek hoop om hierdie keer ‘n pad te stap met die blom…. ter herinnering aan my pragtige blomme-dogters.

xxx