Wat pla?

Dis ‘n baie revolusionêre vraag om te vra. Want my instink is om nie gepla te wees nie. Ek hou nie daarvan nie. Ek is eerder min gespin. En om iemand anders te vra wat pla gee geleentheid vir die persoon om te kla. Wat ek ook nie van hou nie.

Maar wat as ons dieper begin kyk? In plaas van om die vrede te bewaar deur ons frustrasies en irritasies eenkant toe te skuif, moet ons nie eerder leer om eerlik stil te raak en te dink oor die dinge wat ons pla nie? Nie net bolangs nie, maar diep in ons binneste ook?

Soms is die waarhede wat ons ontdek lelik en ongemaklik, maar saam met dit is daar ook sprankies van hoop wat ons nie altyd besef ons eintlik nodig het nie.

Om te erken wat ons eintlik pla, help ons om ons diepste hartsverlange bloot te lê. En wanneer ons weet wat ons diepste hartsverlange is, sal ons lewens dalk meer begin sin maak.

Wat as ons onsself meer gereeld afvra, Wat pla jou? En wat as ons dit meer gereeld vir mekaar vra?

Xxx

Advertisements

Vlerke soos ‘n duif

Vanaand wens ek soos Dawid, dat ek maar vlerke het soos ‘n duif om weg te vlieg en rus te hê. Ek sou ver weg vlieg, ek sou in die woestyn gaan woon. Ek sou my haas om te ontvlug….

Wens jy ook soms so as jy moeg en uitgestres is na ‘n stresvolle dag? Of ‘n paar dae van frustrasies en irritasies? Dis dae wat ek om wens en dis nie reg nie want elke dag is ‘n dag wat die Vader gee; maar daar is regtig net tye wat ‘n mens voel jy kan wegvlieg.

Die woestyn was ‘n gunsteling plek vir profete en manne van ouds om God te gaan vind (alhoewel ek eerder ‘n verlate eiland sou verkies!) Dis ongelukig ‘n luuksheid wat ons nie het nie, om ‘n laaaaaaaang vakansie te neem weg van die normale en alledaagse….

Maar dis lekker om elke dag ‘n mini-retreat te kan hê – ‘n koppie koffie en die Skrif of ‘n goeie geestelike boek.

Dankie Here, vir klein eilandjies van verfrissing elke dag!

En om hierdie rede moet ons nie moed opgee nie. Elke oggend is die Vader se genade nuut, en elke aand kan ons met ‘n geruste hart gaan slaap want Hy sorg vir ons en Hy dra ons dag vir dag – selfs deur die storms.

Dalk is dit eerder nodig dat ons vlerke geknip word sodat ons kan leer om soos arende op die stormwinde te sweef; en nie soos duiwe weg te vlieg nie.

Xxx

‘n Honderd en tien dinge om voor dankbaar te wees

Een van die dinge wat my grensloos irriteer is mense wat heeldag loop en kla oor alles en met niks tevrede is nie. Hulle sien niks positief in ‘n dag nie en is totaal negatief oor alles of hulle het elke dag ‘n ander pyn en kwaal. Hier by ons is so ‘n vrou. Dis pynlik om na haar te luister; sy klink soos ‘n plaat wat vashaak. ‘n Druppende kraan. Sy is erg! Ek kon dit net vanoggend nie meer hou nie en voor ek myself kon keer, toe maak ek half verergd die opmerking dat daar 110 dinge is waarvoor mens elke dag kan dankbaar wees. Haar reaksie natuurlik: Soos wat?

Nou kyk, ek moes my torre mooi agtermekaar kry maar met behulp van my kollegas kon ek vir haar ‘n lys van ‘n honderd en tien redes gee.

Almal het hul eie besige lewens en ons vat selde die tyd om net vir ‘n oomblik stil te raak en te dink aan al die dinge waarvoor ons kan dankbaar wees….

1. Familie

2. Vriende

3. Gesondheid

4. Opvoeding

5. Die geleentheid om te kan leer

6. Kos op die tafel

7. ‘n Warm bad

8. Toegang tot die internet

9. Die vermoë om te kan werk en ‘n inkomste

10. Sonsopkomste en sonsondergange

11. Die vermoë om te kan droom

12. Die vermoë om te kan sien

13. ‘n Dak oor jou kop

14. Om met vakansie te kan gaan

15. Troeteldiere

16. Verrassings

17. Wanneer iemand vir jou glimlag

18. Reënboë

19. ‘n Tuisgemaakte ete

20. Goeie nuus

 

 

21. Sjokolade

22. Die feit dat elke dag ‘n nuwe begin is

23. Die vryheid om te kan stem

24. Die vryheid om te kan kerk toe gaan

25. Moderne medisyne

26. Moderne tegnologie

27. Koffie

28. Drukkies

29. Om te gaan stap

30. Kameras om mooi oomblikke af te neem

31. Die snooze knoppie op die alarm

32. As jy iets kry wat jy gedink het jy’t verloor

33. Stokperdjies en die vermoë om dit te kan beoefen

34. Om te kan dans

35. Jou gunsteling fliek of tydskrif of boek

36. Vars drinkwater

37. Om te kan lag

 

38. Om sonder fisiese pyn te kan leef

39. Lekker slaap soentjies

40. Jou verbeelding

41. Jou kreatiwiteit

42. Om te kan uitsien na iets

43. Slaap

44. Natuur

45. Elektrisiteit

46. Om doelwitte te kan stel en dit te behaal

47. Onvoorwaardelike liefde

48. Om af en toe goed teen spesiale pryse te kan koop

49. Om elke oggend wakker te word

50. Toegang tot medikasie

51. Om tyd vir jouself te hê

52. Mense wat vriendelik is

53. Die feit dat jy uniek is en dat daar niemand anders soos jy is nie

54. Om te leer uit jou foute

55. Naweke

56. Pay-days

57. Seisoene

58. Die vermoë om in kleur te kan sien

59. Wonderlike kollegas

60. Diversiteit

61. Christelike tradisies soos kersfees en paasfees

62. Goeie bure

63. Die onskuld en eerlikheid van ins kinders

64. Om ‘n toekoms saam met iemand te bou

65. Om te kan bid

66. En diep betekenisvolle gesprekke tot in die vroeë oggendure te kan hê

67. Vergifnis

68. Spanwerk

69. Om na musiek te kan luister waarvan jy hou

 

 

 

 

 

70. Gemaklike klere

71. Mense wat die beste uit jou bring

72. Die vermoë om emosies te ervaar

73. Die vermoë om ‘n voertuig te kan bestuur

74. Nuwe vars beddegoed

75. Die vreugde van ‘n tuin en plante

76. Takeaways en restaurante

77. Om passies te hê

78. Transport / Vervoer elke dag werk en winkel toe

79. Ou foto’s

80. Laat slaap

81. Sondae. Rusdae

82. Slegte dae wat ons help om die goeies te waardeer

83. Die vermoë om mense te help

84. Om jammer te kan sê

85. Om oopkop te wees

86. Krag en sterkte vir elke dag

87. Ander mense se goedhartigheid

88. Respek

89. Om erkenning te kry vir jou werk

90. ‘n Hart wat die bloed deur jou are pomp en jou die vermoë gee om te kan voel

91. Longe wat jou help om asem te haal

92. ‘n Immuunsisteem wat jou liggaam teen kieme en siektes beskerm

93. Trane wat jou siel skoon was

94. Teleurstelling, sodat jy kan weet wat regtig saakmaak

95. Pyn en vrese, sodat jy ‘n sterker mens kan word

96. Die son wat elke dag op ons skyn

97. Blogs wat ons met ander skrywers verbind

98. ‘n Bed om in te slaap

99. Sielsgenote

100. Vyande wat jou help om ‘n beter mens te wees

101. Liefde

102. Uitdagings wat jou help om te groei

103. Lewe – vir alles wat jy kan ervaar

104. JY – vir wie jy is en wat jy beteken

105. Om nie hoef te wonder waar jou volgende bord kos vandaan gaan kom nie

106. Dat jy jou rekeninge die maand kan betaal

107. Die vermoë om tussen reg en verkeerd te kan onderskei

108. ‘n Tuiste waarheen jy elke dag kan gaan

109. Die vermoë om na joiself en na ander te kan kyk

110. Bo alles, God se genade wat jou dag na dra

Die doel in doelwitte

Dis al amper einde Junie en ek wonder hoe ver trek mense met hul nuwejaarsvoornemens. Nie ek nie, ek doen nie sulke goed nie. Ek hou nooit daarby nie want die lewe verander te veel en te vinnig. So ek is een van die twee ekstreme as dit by doelwitte kom. Ek is een van diegene wat meestal verkies om nie groot doelwitte of planne te hê nie. Ek het, maar dis met uitsondering. Ek mik na niks, en tog behaal ek ook resultate soos enige ander meer doelgerigte mens in die lewe. Maar ek is meer die “let go and let God” tipe; en minder die intellek.

Die ander ekstreem, natuurlik, is die persoon wat so rigied is in sy besluitneming dat daar geen ruimte is vir ander invloed of leiding nie.

So, wat is nou eintlik die regte manier, om doelwitte te hê, of glad nie? Want aan die een kant skryf Jakobus dat ons nie weet wat die dag van môre vir ons inhou en wat in ons lewe gaan gebeur nie; maar aan die ander kant skryf Salomo weer dat mense wat planne maak, ryk word. Nou hoe nou? Die twee staan in kontras met mekaar; een impliseer om planne te maak is eintlik ‘n mors van tyd, en die ander een sê, gaan vir goud!

Tog sien ons regdeur die Bybel voorbeelde van hoe God sy mense gelei het in hulle besluitnemings. Hy was deel van die proses: van die beplanning tot die uitvoer van planne. Jona wat moes Nineve toe gaan maar aanvanklik nie daar uitgekom het nie. God het sy plannetjies sommer vinnig kortgeknip! Paulus wou gaan evangeliseer en gaan kerke plant, en dinge het nie altyd uitgewerk soos hy beplan het nie. Sy sendingreis Asië toe het nie gerealiseer nie omdat die Heilige Gees hom verhinder het om daar te gaan preek. Die Skrif sê: “Die Gees van Jesus het hulle nie toegelaat nie.” En dan weer kry ons vir Noag wat die lewens van sy familie en die diere in die ark van die vloed gered het. Lank vooruit beplan en stappe geneem om die Godgegewe doelwit te bereik. Josef wat vir Egipte en sy familie voorsiening getref het toe die hongersnood aangebreek het. Weereens, ‘n goeie intellek en goeie beplanning. Nehemia het vir die Israeliete van sekuriteit voorsien deur die muur rondom Jerusalem te herbou. Beplanning en doelwitte. Godgegewe, Godgesentreerd, deur God beïnvloed.

Dit sê vir my dat, wanneer ons planne en doelwitte het – nog voordat ons behoorlik daaraan dink – moet ons dit in lyn met God se wil kry. Ek dink nie Jakobus het bedoel dat ons glad nie mag doelwitte hê nie. Ek dink wat hy probeer sê is, ja, stel julle doelwitte en maak julle planne; maar moenie so onlosmaaklik rigied daarin vas wees nie. “Nee, julle moet sê: “As die Here wil hê dat dit moet gebeur, dan sal ons lewe en dan sal ons hierdie dinge doen” (Jak. 4:15). En hierin lê die balans. Al het Paulus doelwitte gehad, selfs Godgesentreerde doelwitte, was hy sensitief vir die leiding van die Heilige Gees. Hy het toegelaat dat die Here sy planne bestuur en verander soos Hy goeddink.

Dit is nou maar eenmaal so dat dinge vir ons ten goede sal uitwerk wanneer ons ons planne en ambisies en agendas vir God gee sodat Hy dit in lyn met Sy wil kan bring. Hy weet wat vir ons die beste is en Hy wil vir ons die beste hê. Hy begeer dat dit met ons goed gaan en nie sleg nie (Jer. 29:11); en ek praat nie hier noodwendig van sendingreise en kerke plant nie. Ek praat spesifiek uit die staanspoor van ‘n doodnormale, alledaagse lewe. Ons moet leer om God volkome te vertrou met al ons planne en doelwitte, en toelaat dat Hy ons sal lei en in Sy besluite gegrond sal hou.

Mag Hy vir ons die regte insigte gee wat ons elke dag nodig het.

Xxx

Waarop ons minder trots kan wees….

Die Here het ‘n sin vir humor, en eerbaar daarby om die minste daarvan te sê. Gister het ek gedink aan dinge waarop ek kan trots wees. Vanoggend in my stiltetyd, toe word ek teruggebring aarde toe met die dinge waarop ek nie so trots kan voel nie; en dis toe ek Filippense 4:8-9 lees in die Afrikaanse Bybelvertaling vir Almal (ABA): Dink aan alles wat mooi is en waarop jy kan trots wees.

Dink deurentyd die soort gedagtes waarop jy kan trots wees? Ja. “Center your mind on them [thoughts that are authentic and real, honorable and admirable, beautiful and respectful, pure and holy, merciful and kind], and implant them in your heart. Practice them in your daily life.” (Amp.)

Doen ons dit in die praktyk? Ongelukkig nie. Inteendeel, ek dink meeste van die tyd is die toestand van ons gedagtewêrelde glad nie so bewonderingswaardig soos ons goue lysies van trots nie!

Sien, ons kan uiterlik dinge doen waarop ons kan trots wees; waarop ander mense kan trots wees. Maar wanneer dit by die gedagte-wêreld kom waar niemand kan sien nie, dan verander die storie.

So wat sê ons nou, nog steeds breëbors? Ek dink nie so nie.

Wat egter diep uit ‘n mens se hart kom, maak die verskil en kan maak dat God niks daarvan hou nie. Want dit is van binne af, uit wat ‘n mens begeer, dat vuil gedagtes groei, soos om ander se goed te vat of jou seksueel sleg te gedra…. dinge soos moord, om ontrou te wees in die huwelik, om meer te begeer as wat jy het, om mense kwaad te wil aandoen en allerhande skelmstreke te beplan, om nie om te gee wat jy doen nie, of dit nou reg of verkeerd is, om jaloers te wees op ander mense, om lelik met en van ander mense te praat, om te veel van jouself te dink en nie jou plek te ken nie en sommer net ligsinnig te wees. Al hierdie dinge kom uit die binnekant van die mens – dit is dinge waarvan God nie hou nie en dit maak mense voor Hom onrein en onaanvaarbaar. Mark 7:20-23, DB

Dit som alles op, wat Jesus hierbo sê. Ons gedagtewêreld vorm die basis van van ons dade en woorde. Dit vorm ‘n groot deel van wie ons is, hoe en wat ons dink, hoe ons optree. Daarom is dit so belangrik vir ons om ‘Bybels’ oor alles te dink. En hoe is ‘Bybels’? Want sekerlik het ons ‘n stryd wat ons in ons gedagtes moet voer. Op een of ander wyse moet ons ons koppe regkry as ons op goeie voet met God wil bly. Maar hóé? Hoe weerstaan ek die slegte goed wat in my kop broei, wat ‘n impak op my daaglikse lewe het en my gedrag beïnvloed?

Dis eintlik heel eenvoudig en dis die wonderlike daarvan. Paulus sê eenvoudig, Vul julle gedagtes met alles wat waar, eerbaar, skoon, suiwer, lieflik en lofwaardig is (NLV). Met ander woorde, dink aan dit wat saakmaak, dinge wat ordentlik en reg is, dinge waaraan God sal dink (dit sal WOW wees!) en waarvan Hy sal hou, dinge wat God sal sê goed is. Kort en kragtig: Moenie jou tyd mors om aan allerhande nuttelose te sit en dink nie. Hou jouself besig met dinge wat die moeite werd is en wat saakmaak, dan sal jy nie sit en crap uitdink nie.

My uitkyk oor die hele storie van “trots wees op jouself” het ietwat versag na hierdie reality check. God het altyd maniere om ‘n mens gegrond te hou.

Xxx

Deel saam: Lig jou vibrasie!! Waarop is jy trots vandag?

Deel asseblief saam met my op hierdie onderwerp. Dis altyd lekker om saam te kan gesels. Vandag dink ek aan redes hoekom ek trots is op myself; en redes hoekom ons maar trots mag wees op onsself want party van ons kan tog so hard wees op onsself!! Ons spandeer so baie tyd om te dink oor die dinge wat ons verkeerd gedoen het en die foute wat ons gemaak het en die dinge waarmee ons sukkel. In ‘n perfekte wêreld sal ons nooit hoef fout te vind met ons imperfeksies nie. Maar ons lewe nie in ‘n perfekte wêreld nie en ten spyte van al ons imperfeksies, is daar tog so baie redes waarom ons kan TROTS wees op onsself, net soos ons is.

So, hier is my redes hoekom ek trots is op myself vandag:

Ek het tot dusver alles oorleef wat die lewe na my kant toe gegooi het; en party van dit was regtig egtig bitter moeilik gewees!! What doesn’t kill you, makes you stronger.

Ek het baie lewenslesse geleer; veral uit my foute. En ek doen soveel beter vandag as gevolg daarvan!

Maar ek het nie net kosbare lewenslesse geleer nie; ek leer nou ook verder in my werk en ek het al een kwalifikasie agter my naam. Nog twee weke dan is ek klaar met ‘n kursus by die Universiteit van Kaapstad. Ek vorder!

Ek help graag ander mense en ek hou daarvan om mense te laat glimlag en te inspireer.

Ek is dankbaar vir die uniekheid waarmee ek geskape is; vir die talente en gawes waarmee ek geseën is en waarmee ek ‘n aanwins kan wees en ‘n verskil kan maak.

Ek het goeie dinge in my lewe bereik en die beste daarvan was om ‘n MA te kon wees. Ek is ‘n goeie Ma. You can be a mess and still be a good mom. We are allowed to be both.

So, die volgende keer wanneer ons in sak en as sit of wanneer ander mense ons kritiseer (of onsself), kan ons ‘n oomblik vat om al die redes te onthou hoekom ons kan trots wees op onsself en hoekom ons liefde en respek verdien. Leer om jouself op te bou, veral met die klippe waarmee ander jou gooi. Gebruik dit as boustene om jouself te herinner dat, as dit al is waaruit jou lewe bestaan: dat jy jouself en jou lewe bymekaar probeer hou, is dit iets om op trots te wees.

Ek is trots op jou!!

xxx

Die Liggaams-eed

Ek beloof om te begin om my liggaam meer te waardeer en lief te hê – ongeag hoe ek voel en hoe ek lyk.

Ek sal ophou om negatief oor myself en my liggaam te praat en ek sal negatiewe gedagtes blokkeer en ignoreer. Nie alles wat ek oor myself dink of sê is waar nie.

Ek sal nie snedige aanmerkings maak oor hoe ander vrouens lyk of oor hulle liggaamsbou nie. Alle soorte liggaamsbou kan mooi wees as ‘n vrou gemaklik is met haarself en haarself aanvaar.

Ek beloof om mooi te kyk na myself; gesond te eet en gesond te leef.

Ek sal myself nie vergelyk met hoe ander vrouens lyk nie.

Ek sal my nie aan enige vorm van media steur nie. Hulle stel vals standaarde van hoe ‘n vrou behoort te lyk.

Ek beloof om meer te fokus op my sterk punte, wat ek bereik, en dat ek uniek is.

Ek beloof om nie so hard op myself en self-krities te wees nie. Wanneer ek ‘n fout maak, sal ek daaruit leer, dit agter my sit en aanbeweeg. Nie dae lank daaroor sit en tob nie.

Ek sal werk aan die minder goeie dinge in myself, maar ek hoef nie my persoonlikheid of my liggaam te verander vir enige iemand nie. Dié wat my nie aanvaar nie, is nie my vriendskap of geselskap of menswees werd nie!

Ek beloof om op te staan vir myself en vir ander wanneer ek lelike opmerkings hoor. Elke vrou verdien respek en liefde.

Ja, dit is U wat my gemaak het, ‘n mens wat kan voel en dink. U het my hele liggaam gemaak voordat ek gebore is. Psalms 139:13 ABA

Ek wil U prys omdat U my so volmaak geskep het. U doen wonderlike werk. Ek weet dat U groot dinge kan doen.

Daar is nie ’n been in my wat uit sy plek is nie. U ken my totaal. Alles is soos U dit wil hê. U het my gemaak. Psalms 139:14-15 DB

Die gedagte daaraan is heeltemal te groot om te verstaan, en ons hoef nie. Maar ons moet weet en aanvaar dat ons elkeen na God se hand en wil geskape is, tot in die fynste detail. Ons het ‘n verantwoordelikheid teenoor onsself en teenoor ander om ons liggame op te pas, geen skade aan te doen nie, en lief te hê. Dit is per slot van rekening nie ons eiendom nie, maar dit behoort aan Hom wat ons gemaak het. Mag ons ons liggame afsonder as instrumente in God se hand en tot Sy beskikking stel – van kop tot tone; al ons vermoëns – fisies en geestelik – en net doen wat Hy sê.

Xxx

Dit is my storie

Gister het ek ‘n paar random goed neergeskryf van wat ek graag ernstig aan wil werk. En ek wil. Regtig. Kan ‘n mens verander? Ek glo so, as jy wil. As jy toelaat dat die Here in jou hart en in jou lewe werk. Dit gee ons hoop: dat Hy die goeie werk wat Hy in ons begin het, enduit sal voer. En dis hartseer dat daar mense is wat dit nie glo nie; wat nie kan glo dat die Here iemand se hart en se lewe kan verander nie. Hulle worstel met die lelike dinge in hulleself – die lelike dinge wat maar inherent in elkeen van ons is – en dan gaan soek hulle dit in ander mense se lewens, maar hulle kom nooit op die punt om te aanvaar en te glo dat God in staat is om iemand te kan verander nie. Want hulle is nie bereid om te verander nie. Dis wie ek is. Kruidjie-roer-my-nie.

Dis jammer. Want God is vasberade om lewens te verander, en Hy wil dit graag doen. Elke mens worstel met die lelik van een of ander sonde in hul lewens. Party mense dink hulle is volmaak, maar hulle misgis hulself lelik. Ek is onlangs vertel dat ek leuens hier skryf en dat my ‘aanhangers’ my nie meer sal jammer kry as hulle die waarheid sou weet nie. Want dis hoekom mens blykbaar blog, om aanhangers te werf en sensasie te soek. Sien, die ding is, ek is nie bang vir die waarheid nie. Ek het niks om weg te steek nie. Soos ek sê, elke mens worstel met goggas in hul binneste. Elke mens het ‘n geraamte of twee in die kas. Hier is myne: Vir jare het ek geworstel met ‘n soeke na aanvaarding en goedkeuring van mense. Dit was my grootste swakheid in die lewe, van jongs af. Ek wou méér wees in die lewe; en dit het gelei daartoe dat ek my oorgegee het aan seksuele losbandigheid wat gepaard gegaan het met buite eglike verhoudings en aanlyn verhoudings. Ek wou net sosiaal aanvaarbaar wees en het liefde gesoek. Op totaal die verkeerde maniere en plekke. Dit was deurlopend aan en af in my lewe. Partymaal het dit goed gegaan vir lank, ander tye het ek geswig en geval. Dit was ‘n sielkundige ding wat ek moes oorkom het.

Dit was toe, en nou’s ek hier. Dis verby. Was gewees. Vandag kan ek terugkyk en sê, ek is baie diep uitgehaal en dit sit my in die regte posisie waar ek as instrument gebruik kan word om vir ander mense op grond van my slegte ervaringe te kan help. Jy kan nie iemand anders wil help as jy nie self deur so ‘n situasie was nie want jy het geen verwysingsraamwerk nie. Ek troos my daaraan, God het my gered uit die diepste van donker en vuil dieptes. Hy verwyder ons oortredinge so ver as die ooste van die weste en gooi dit in die dieptes van die see om nooit weer daaraan te dink nie. So mense kan my vandag beskuldig dat ek ‘n hoer is, dis okei. Ek is goed bekend met die lewe wat ek gelei het. Ragab was ook ‘n hoer, en God het haar gered. So ook die vrou by die put wat baie mans in haar lewe gehad het waarvan nie een haar eie was nie. Jesus het haar oë oopgemaak en haar siel gered. Die onsedelike vrou wat die Fariseërs wou gestenig het, het Jesus gered. Nog ‘n seksueel onreine vrou het Sy voete met haar hare en kosbare olie ingevryf. Hy het haar siel ook gered. Sien, God is in die besigheid van verlossing en transformasie. Dis Sy spesialiteit. En Hy doen nie halfhartige werk nie.

Van tyd tot tyd in ons lewens is daar areas waarmee ons sukkel; areas wat ons wens kon anders gewees het. Maar weet jy wat? Die Here bring ons op plekke in ons lewens en in situasies waar ons hierdie donker areas moet benader; waar ons ‘n weg moet vind om te wil verander. Dit is wat God se genade doen: dit bring ‘n kragtige verandering in ‘n mens se hart en se lewe. Ongetwyfeld. En wat is genade? Joseph Cooke het dit mooi beskryf, hy sê: Grace is nothing more nor less than the face that love wears when it meets imperfection, weakness, failure, sin. Dis daardie kwaliteit van God wat maak dat Hy nie met ons reken volgens ons sondes nie; wat maak dat Hy hom nie op ons wreek volgens ons oortredinge nie. Dit is God se getrouheid. Hy bly getrou, al is ons ontrou. Dit is wat liefde is; wat liefde behoort te wees: To love the unlovely, the weak, the inadequate, the undeserving, and the despicable. Onverdiende genade.

Ek is die laaste een wat dit verdien het, maar ek moes deur die vuur en die vloed gegaan het om daar te kom en Sy genade te kon ontvang. Niemand hoef dit te glo nie, maar dit was – is – lewensveranderend. Ons het God se genade die meeste nodig die oomblik wanneer ons bewus word van sekere aspekte in ons lewens wat verkeerd is. Ja, ons elkeen het ‘n goeie kant en ‘n slegte kant. En dan het ons daardie kant wat ons liewer wil wegsteek; die dinge waarvoor ons skaam is. Op grond hiervan beoordeel die wêreld ons. Hulle aanvaar ons op grond van ons goeie kant, en verwerp ons op grond van ons slegte kant. Maar nie God nie. Hy is nie so nie. Sy gedagtes is nie ons gedagtes nie. Hy kyk nie na die een of die ander kant nie. Hy aanvaar ons as ‘n geheel, net soos ons is. Nie as ‘n gesplete persoonlikheid nie. En dit maak nie saak hoeveel keer ons op ons eie probeer om ons slegte dele beter te maak nie, ons kan nie. Nie op ons eie nie. Dit sal nooit goed genoeg wees nie want God is volmaak. Daarom moet ons al ons dele – goed en sleg – vir Hom gee sodat Hy ons kan heel maak.

Party dinge wat met ‘n mens gebeur is net aaklig sleg, maar ons moet aanhou lewe, en aanhou met ons lewens aangaan, en weer sin vind. En aanhou bid vir hulle wat ons haat, want as hulle bly vasklou en vaskyk in die verlede en dink ons is die oorsaak van al die sleg in hulle lewens, lê daar vir hulle net benardheid in hulle lewens voor. Maar ek kan nie. Ek weet wat ek was en ek weet waar ek nou is. Ebenhaeser: tot hiertoe het God my gelei. Hy het nie die rooi see weggevat nie, Hy het dit oopgemaak. Hy het nie verby die tuin van Getsemane gegaan nie, Hy het daardeur gegaan vir iemand soos ek.

Slotsom is dit: Kry God se shalom vrede in jou hart. Jy is in Sy hande. Elke saak is in Sy hande. Hy voorsien op die ongelooflikste maniere; en stuur mense en situasies op jou pad wat jou elke dag bekragtig. Met tye voel ons oorweldig, maar dan kom Hy en maak alles stil in ons. Soms kry ons wysheid wat nie ons s’n nie. Hy verander ons, want Hy is lewend. Hy is in beheer met elke situasie wat ‘n mens deur gaan. Hy gee die vrede en die uitkoms gee. Skep goeie moed!

My hartsvriendin het vir my hierdie kosbare woord gegee: Kom iemand met die verlede se sondes, selfs huidige tekortkominge en gooi dit teen jou, dan sê God, sy is witter as sneeu. As ons ons sondes bely het en God ons vergeef het, kan die duiwel maar los. Geen verlede sonde word jou weer toegereken nie. Nie jou twyfel nie, nie jou sonde nie, niks nie. Mits jy dit bely en laat staan het. Die borswapen van geregtigheid. Dis soos jou Rots, dit beskerm jou teen alle bose aanvalle. Hy doen die werk in jou, saam met jou. En dis ‘n lewenslange proses. Dit vat tyd. Wat God in jou wil verander sal Hy verander, op Sy tyd en manier. Daarom, aantuigings, beskuldigings, ensovoorts maak nie meer saak nie. God sal die goeie werk wat Hy in jou begin het, enduit voer. Hy vorm ons dan op maniere wat Hy goeddink. Jy is nou Sy eiendom, klei in Sy hande. Daarom kan jy Hom vertrou.

 

 

 

Dinge waaraan ek móét werk

Aan myself:

Leer om nee te sê. Stel jou perke duidelik. Jy het niks om oor skuldig te voel nie.

Jy kan nie bitter wil wees en verwag jou lewe moet soet wees nie.

Om jou tong in toom te hou is nie die probleem nie. Dis jou gesigsuitdrukking wat jou weggee.

Moet nooit toelaat dat jou emosies jou intelligensie beïnvloed nie. Bly rasioneel en kalm, ongeag die situasie. Bly altyd bó die situasie.

Jy kan ure, weke, maande, jare spandeer om alles te oor-analiseer en die stukke aanmekaar te probeer sit; te regverdig wat kon gewees en kon gebeur het…. Dit help nie. En dis nie jou werk nie.

Alles in die lewe gaan nie verloop soos jy dit wil hê nie. So verwag eerder niks en gaan saam met die vloei van die lewe.

Smile and wave!! 👋