Grondpad…

….wat ek nooit ooit sal wil oor stap nie. Ja, daar was dae wat ek die mooiste view gehad het en dan was daar dae wat ek kaalvoet oor die klippies moes hardloop om net op n beter plek te kom as gister… soms op my knieë geval omdat ek net nie kans gesien het om verder te loop nie. Dan was daar dae waar ek rustig kon loop sonder omkyk of omdraai. Ek het wel die mooiste blommetjies in die veld gepluk wat saam my gereis het, van hulle het ek oppad verloor maar dis okay… dan was daar dorings wat my vele kere gesteek het dat ek vir dae net nie meer kon loop nie… maar dis ook okay… Dit was n lang pad, soms sonder water, soms sonder suurstof, soms met geskeurde skoene maar dit was n goeie pad… iets geleer? Absoluut .. dat niemand die pad vir jou kan stap nie maar wel net saam jou, dat niemand jou gelukkig kan maak as jy nie self gelukkig is nie, dat niemand jou tas vir jou gaan sorteer nie, dat min mense jou enduit gaan help, dat beloftes soms leë woorde is, dat opgee nooit n opsie is nie, dat mens soms moet sit en rustig word en dankie sê… dat daar altyd iemand sal wees wat in die middel van jou reis sal staan omdat hulle dit nie vir jou gun nie… dat mens net die beste weergawe van jouself kan wees en om nooit jou moed te verloor in iets wat mens regtig wil bereik nie. Tot hier het ek dit gemaak, as ek hierdie jaar in perspektief moes verstaan sal dit moeilik wees om te verduidelik. Van struikel, opstaan en aangaan… het ek soveel geleer van myself en van hierdie wêreld waarmee ons elke dag te doen kry. Daar was goed en sleg maar ek sien uit na die nuwe grondpad wat voorlê. Dankie aan al die blommetjies wat saam my dit enduit gemaak het, elkeen van julle het julle eie kleure, reuk en vorm gehad en so het ek by elkeen iets geleer. Wat nou voorle weet nie ek of jy nie, maar wat ek wel weet is dat ek beter skoene moet kry, ‘n groter rugsak, meer water en soveel meer suurstof om my nuwe roete aan te pak… Veilig reis, wees lief vir mekaar, help mekaar, droom saam, lag saam en maak tyd vir alles en mekaar. Vir jou… Dankie vir die deeltjie plesier en stukkie hart wat ek saam op my reis deur 2017 kon dra… Mag die Here elkeen van ons soos altyd lei op die onbekende pad van 2018 en mag ons nooit vergeet van Sy groot genade nie. Mooi week en mooiloop die laaste gedeelte van 2017.

Xxx

**Dankie oom Hans Haggard van die APK**

Advertisements

Mens sana in corpore sano

“In a sound body rests a sound mind.”

So sê die wyses, en dis sooooo waar. Ek staan elke oggend half vyf op om vyfuur te gaan oefen. Elke aand voor slapenstyd spandeer ek tyd om my program vir die volgende dag uit te werk. Ek lééf daarvoor!

My voorkoms is vir my belangrik en hoe ouer mens word hoe moeiliker word dit om in “shape” te bly. Die lewe na 40 is nie vir sissies nie! Daarom glo ek dat ‘n mens se liggaam op een of ander wonderbaarlike wyse aan jou siel en verstand gekoppel is. As jy na jou liggaam kyk, is jou verstand ook helder en gesond.

Ek besef dit gaan lank vat om my doelwit te bereik, maar dit maak nie saak nie. Ek het nie ‘n wenstreep wat ek najaag nie, ek het ‘n leefstyl om te handhaaf.

Ons is gevoelsmense en ons kan nie goed doen as ons nie goed voel nie. Om tyd te maak vir jouself weg van die werk en weg van die gejaagdheid en weg van jou daaglikse roetine om op jouself te fokus is nie selfsugtig en selfgesentreerd nie. Dis absoluut essensieël, glo ek, en nooit ‘n mors van tyd en energie nie. Nooit! As my dag nie begin met fisiese oefeninge nie, kan ek maar weet ek gaan beneuk wees en minder produktief, minder kreatief en minder dinamies. Moenie my vra hoekom nie, dit is net so.

Elke mens het sy eie aktiwiteite en goedvoel resep, maak nie saak wat nie. Jy werk daarvoor. Verander jou leefstyl daarvoor. Jou eetgewoontes. Jy sweet daarvoor. Baie trane en sweet! Maar DIT IS DIE MOEITE WERD.

Ja, daar sal altyd mense wees wat gaan opmerkings maak. Mense by die werk het al vir my gesê ek is mal om so vroeg op te staan en dit om te gaan gim. “Vir wat?” vra hulle en kyk jou op en af asof jy van ‘n ander planeet af kom. Weet jy skat, ek mag mal wees, maar ek pluk die vrugte. En as ek die storie so kyk dan  lyk dit of jy ook kan doen met ‘n bietjie oefen!

Ek gaan gim toe want vir my is dit ‘n ontsnapping van ‘n besige roetine. Dis my “sanity” waar ek werk om nie net fisies sterk te word nie, maar ook geestelik en verstandelik.

Soos die NIKE advertensie sê: Just do it!

905af0379e93810ec1486338469b6e3e--inspirational-quotes-motivation-fitness-inspiration-workout-quotes-inspirational

Vergewe jouself

Laaste op die lys, die moeilikste: FORGIVE YOURSELF FOR YESTERDAY’S MISTAKES…. Is ek die enigste een wat hiermee worstel?? Elanè het gesê ek is te hard op myself, en sy is reg. Ek is. BAIE. Self-krities. Oor foute van nou, en foute van gister en al die gisters voor dit. Oor verlore en verspeelde geleenthede. Oor vertroue in mense wat my verkeerde raad gegee het. Oor vertroue in my eie stupid intuïsie. Ek het nie van beter geweet nie, maar ek doen nou. Die lesse was nodig, ek moes eerstehands leer.

Vergewe jouself bo alles. Hou op om negatiewe dinge oor en oor in jou gedagtes af te speel. Jy word ‘n gevangene van jou verlede deur gedurig jou foute te herleef en jouself te kasty daaroor. Hou op om jouself te verwyt oor wat moes en kon gewees het. Laat los, laat gaan, beweeg aan.

how-to-forgive-yourself-for-past-mistakes-5834-zmZjfXeW3ZOdzJdrV4Y!

Glimlag….vir geen rede

No. 4: SMILE FOR NO REASON.

Al ooit jouself gevang glimlag vir geen rede? Ek ook. Al baie. Dan kyk ek eers rond of iemand my sien en seker wonder of die vrou al haar varkies op hok het. Al agtergekom as jy glimlag dat dit mense om jou nuuskierig maak? Ag man, dis net lekker om te glimlag!

Daar is so baie dinge waaroor ons kan glimlag…. ‘n goeiemôre boodskap op ons selfone, ‘n lawwe gedagte wat by ons opkom, mooi herinneringe, die natuur, heerlike weer, ander mense wat glimlag….

Begin en eindig alles met ‘n glimlag, en hou die lied in die hart!

c1df9da6e68cedf17fe5d1e981e6011c

Haal DIEP asem

Derde op die lys van vyf dinge is TAKE A DEEP BREATH. Klink simpel, maar as jy soveel chaos in jou lewe het soos ek, dan raak dit naderhand normaal. Jy raak gewoond aan dit. Ek het al geleer om terug te staan, ontspan, kalmeer, diep asem te haal en probeer kyk hoe ek dinge kan maak werk eerder as om te loop en kla oor alles wat verkeerd loop.

Dus, wanneer jy frustreerd voel in ‘n situasie, haal diep asem en as dit nodig is, draai om en stap weg.

278f544b9c2d45c51c1a7d44e1c6ed8d--just-breathe-love-notes

Intensies – maak dit regtig saak?

Tweede op die lys van “5 things to do” is SET YOUR INTENTIONS.

Goeie intensies? Minder goeie intensies? Is daar nie ‘n spreekwoord wat sê die pad hel toe is uitgelê met die beste intensies nie?? As ons fokus op die kragtige, euforiese, magiese, sinkronistiese, mooi van die lewe, sal dit na ons kant toe kom? Ek weet nie, maar ek is hopeloos te sinies vir so ‘n siening. Dit klink te veel na lala land, so kom ons bly realisties.

Is dit die intensies wat saakmaak, of die aksies wat ons neem op daardie intensies? Ons is immers wat ons doen en sê, nie wat ons van plan is om te doen nie, nie waar nie?

So, aan die einde van die dag het ek gesit en net gebreinstorm en vir myself ‘n lysie gemaak. Niks fancy of uitspattig nie, en intensies is nie ‘n once off ding nie. Mens word elke dag met intensies wakker, maar hier is ‘n paar wat ek dink ek onder die top tien van my daaglikse intensies sal plaas:

  1. Wees JOUSELF.
  2. Moenie alles oordink nie.
  3. Wees altyd bereid om jouself te verbeter asook die lewens vir ander makliker te maak.
  4. Moenie so gou moed opgee nie.
  5. GLO GLO GLO alles is moontlik.
  6. Werk hard.
  7. Gee sonder om terug te verwag.
  8. Dans op die musiek wat die lewe vir jou speel, al is dit nie jou smaak of voorkeur nie.
  9. Hou die lied in die hart!
  10. Moet nooit ophou bid en moed opgee met jou dogters nie.

9bd8037580d748648770877480949e68

Vyf dinge, vyf dae

My whatsapp profiel praat van “5 things to do before you get out of bed.” Ek wil egter nie al vyf dinge op een slag hanteer nie, maar eerder een vir een vat en daaroor dink. Elke dag is so ‘n gejaag dat tyd vir stil raak min is, maar ‘n mens moet ook leer om die tyd uit te koop vir dit wat goed is vir jou siel.

Die eerste gedagte is, EXPRESS GRATITUDE…. en vandag in die besonder is ek dankbaar vir hierdie geweldige belofte:

8873164c124167e611b50b857960cd42--bible-verses

Dis nie die moeite werd om terug te baklei in eie krag en eie insig nie. Party mense is net eenvoudig nie jou kommentaar werd nie.

Gee net oor. Surrender. Draai die ander wang.

Dankie Here, dat U by magte is om selfs die kwaad om te keer in iets wat goed is. Dankie dat my oorgee ‘n kragtige wapen in U hand is.

Xxx

Ontmoet vir Patat

1512229144090

….my ma se nuwe wees-kalfie. Mamma-koei het bly lê ná Patat se geboorte en kon nie na haar omsien nie, sy was te swak. My stiefpa het haar huistoe gevat en begin bottelvoed. Sy sterk baie mooi aan.

My hart kry so seer vir Patat. Mis sy haar mamma? Dink sy snags as sy alleen in die hok is, of as sy bottel drink, aan haar mamma? Net Patat sal weet, maar ek het ‘n vae idee van hoe dit voel….

Ek kom uit ‘n disfunksionele familie waaraan ek geneties verbind is, maar geen betekenisvolle verhouding hoegenaamd mee het nie, behalwe my ma. Dis reg, geen kontak met familielede nie, ook nie my pa nie. My ma trek binnekort sak en pak Gouritsrivier toe; en vir die eerste keer in 42 jaar gaan ek alleen agterbly sonder ma, sonder man, sonder kind of kraai. Ek begin voel soos ‘n weeskind. Postmasburg is nie juis ‘n plek waar mens kan uitgaan en vriende maak nie. Nie by die werk of by die kerk nie want die samelewing hiersô is net so disfunksioneel. Elkeen is vir hom of haarself.

Patat het ‘n rol in haar kalf-lewe verloor. Ek kyk vanoggend na my potplante en dink, elke plant staan in sy eie pot, geforseer om te groei in die spasie waarin hulle geprop is. Hulle het ook in ‘n mate hulle natuurlike rolle verloor; net soos ek my rol as ma vir my dogters verloor het; as dogter vir my pa; as vrou vir ‘n man; as deel van ‘n familie.

Ek kyk na Patat en ek weet, verlies is nie iets wat ligtelik is nie. Dit laat ‘n mens weerloos en breekbaar voel, en jy bly gedurig soekend na iets tasbaar om die leemtes te vul. Dis ‘n konstante gevoel van verlorenheid. Jy pas nooit rêrig iewers in nie. Daar is geen instruksies of “how-to” gids om jou te help cope nie. Niks om jou te help voorberei nie. Die kind in jou is amper ontroosbaar want jou daaglikse bestaan, bestaan uit ‘n stryd om oorlewing en om jou eie pad deur die wildernis oop te kap.

Ek ken ‘n weeskind wat my ma-hulle destyds ingeneem het oor skoolvakansies. Hy was so te sê deel van die gesin. Ronald het nie sy situasie as verskoning gebruik om op te gee en te stagneer nie. Hy het dit as katalisator gebruik en hoog uitgestyg. Vandag is hy ‘n suksesvolle ingenieur en werk en woon saam met sy vrou en babadogtertjie in Kanada.

Sien, ten spyte van die slapelose nagte en mistroostige dae en die verlange en hunkering wat mens vir niemand kan beskryf nie, leer jy tog ‘n skyn van normaliteit. Elke oomblik van stilte en isolasie en kalmte is ‘n seën van Bo.

Die lewe gaan aan, en die seer gaan nie weg nie, maar jy vind elke dag iets nuuts om voor dankbaar te wees. Die klein dingetjies in die lewe is wat saakmaak, soos ‘n rooi blom in jou tuin. Jy waardeer nie net die lewe nie, maar die feit dat jy lewe, meer…. En jy leer dat jy eintlik sterker is as wat jy gedink het – want Hy wat jou gevorm het, het jou by die naam geroep en jy behoort aan Hom: ‘n Vader vir die wese, ‘n Tuistegewer vir die eensame; ‘n Ondersteuner van en Regter vir weeskinders en weduwees; ‘n Leermeester wat ons leer hóé om te lewe en wat ons op ‘n gelyke pad lei.

“Selfs al sou my pa en ma my verlaat, die Here sal my styf vashou.” Ps 27:10

In ‘n stortvloed van trane en in elke gebroke hart, vertoef God geduldig. Aan die einde van elke eensame pad, wag Hy geduldig vir Sy kind.

*opgedra aan Patat*

Xxx

 

 

Dis rooi en dis mooi

Die rooi bloeisel is oop, is dit nie WOW nie?!

1512140581285

Wat my laat dink… Is ons gedagtes nie ook so nie? As ons dit bewerk en gesond hou, sal dit blom; maar as ons toelaat dat die onkruid oorneem, sal dit verlep en eventueel doodgaan en ons sal nooit ons volle potensiaal bereik nie. Wat ons insit is wat ons uitkry; so vermy negatiewe invloede en wees baie sorgvuldig oor wat jy in jou gedagte-tuin toelaat. Negatiewe en afbrekende en vernietigende gedagtes verdien nie die luuksheid van ons pragtuine nie!

Xxx

Positiewe veranderinge

Môre is Sondag. Ek tree uit as orrelis by een van die twee gemeentes by wie ek die afgelope vier jaar uitgehelp het. “Alles het sy bepaalde uur, en vir elke saak onder die hemel is daar ‘n tyd.”(1) Die tyd het aangebreek vir my om die finale noot te laat klink. Kerktoe gaan elke Sondag is vir my ‘n belangrike saak, maar ek wil nie net kerk toe gaan om die getal vol te maak nie. Ek wil gaan omdat ek voedsel vir my siel nodig het. Die musiek is ‘n bysaak. Maar om Sondag na Sondag in ‘n plek te gaan sit waar my siel meer skade ly as goed, dan is dit ‘n teken dat dit tyd geword het om aan te beweeg. En dis nie science fiction nie. Elke verandering in ‘n mens se lewe begin met ‘n keuse dat jy óf iets gaan begin doen…. óf dat jy gaan ophou om iets te doen.

Ek het die afgelope tyd ‘n paar veranderinge gemaak, en dit was bloot ‘n kwessie van: vat net weer ‘n bietjie tyd en doen dinge vir jouself. Kry negatiewe mense en dinge van jou nek en rug af. Mense, veral, wat knaend negatief is of hulself met negatiwiteit omring sien nie die mooi en goed in die lewe raak nie. Aan die anderkant, as jy positief leef, begin jy daaglikse met meer positiewe situasies, geleenthede en mense te doen.

Buiten om af te skaal van die orrelspeel, het ek nog ‘n positiewe verandering in my leefstyl gemaak, naamlik om soggens vroeër op te staan en gim toe te gaan voor werk. Ek is nou amper vyf jaar in Postmasburg, en ek het 5 jaar laas geoefen. Dit doen my nie net fisies goed om te oefen nie, maar dit gee my ook ‘n doel; ‘n dryfkrag; dit leer my dissipline. ‘n Mens voel net soveel beter oor jouself as jy oefen en jou brein skei daai happy hormoon (endorfiene) af. Dis die beste anti-depressant op my lys van anti-depressante!

Nog iets waaraan ek verander is my ondersteuningsnetwerk. Ek elimineer mense wat nie goed is vir my gemoed nie, en fokus eerder op diegene wat addisionele voordele verskaf soos byvoorbeeld geestelike en morele ondersteuning. Al verkeerd ek nie noodwendig sosiaal met hulle nie, is dit nog steeds beter as om my op te hou met mense wat my meer frustrasies besorg as enige iets anders.

Elimineer ook die minder belangrike dinge. Ek begin nou te fokus op dit wat vir MY belangrik is. Nie op dit wat ander mense dink belangrik is nie. Dit gebeur dikwels dat ons te veel hooi op ons vurke laai, en OORlaai. Dan eindig ons op om dinge te doen wat nutteloos en futiel is, omdat ons toegelaat het dat daar te veel jakkalse in ons wingerde ingesluip het…. en gewoonlik gaan dit om ander mense tevrede te stel.

Ek probeer om ook nie meer reusetreë vorentoe te gee nie. BABATREETJIES. Dis die geheim. Want dit gebeur dikwels dat wanneer ‘n mens na die groter prentjie kyk, dan raak jy oorweldig. So, breek net die groter prentjie af tot sistematiese, haalbare doelwitte. Dit sal jou rede gee om elke dag breed te glimlag!

Die punt is, elke positiewe verandering kring uit en maak sy eie kettingreaksie. Een verandering op ‘n slag en jy sal verbaas wees hoe jou lewe oor ‘n week, of ‘n maand, of ‘n jaar lyk. Maak skoon dit wat jy NIE wil hê nie. Moenie wag vir iemand anders om iets te doen nie; doen dit self en neem die eerste stap na ‘n positiewe leefstyl. Verander wat jy kan verander. Aanvaar wat jy nie kan verander nie. Verwyder jouself van die onaanvaarbare. Jy sal nooit uit daardie groef in jou lewe kom as jy nie die besluit neem dat dit nie is waar jy wil wees nie.

xxx

NS: O ja, en die kleur van November is goud+geel….

November

 

 

 

 

 

 

 

 

 

 

 

 

(1)Prediker 3