By die waters

Ons kamp by Bloemhofdam die naweek. Die dam is mooi vol teenoor die ongeveer 26% so ‘n jaar of wat gelede. Mens kan nie glo wat water aan ‘n plek kan doen wat  droog en dor en leweloos was nie. Dit laat my dink aan wat Jesaja geskryf het:

“Die Here sal jou altyd lei. Selfs in tye van droogte sal Hy voorsien in jou behoeftes. Hy sal jou gesond en sterk hou. Jy sal wees soos ‘n tuin wat genoeg water kry, soos ‘n fontein wat altyd aanhou vloei.”

The following extract from Campbell (African Light), may illustrate this passage: ‘In a hot climate, where showers seldom fall, except in what is called the rainy season, the difference between a well and ill watered garden is most striking. I remember some gardens in Africa, where they could lead no water upon them, the plants were all stinted, sickly, or others completely gone, only the hole left where the faded plant had been. The sight was unpleasant, and caused gloom to appear in every countenance; they were pictures of desolation. But in other gardens, to which the owners could bring daily supplies of water from an overflowing fountain, causing it to traverse the garden, every plant had a green, healthy appearance, loaded with fruit, in different stages toward maturity, with fragrant scent proceeding from beds of lovely flowers; and all this produced by the virtue God hath put into the single article of water.’

Die fonteine van vergifnis, vrede en blydskap is altyd oop en tot oorlopens toe vol. Die strome van verlossing vloei altyd. Die moeë pelgrim mag enige tyd daar gaan vertoef, maak nie saak hoe ver die reistog of hoe diep die slyk van sonde nie; of hoe dikwels ons daarheen gaan nie. God se water van rus; Sy strome van seën; Sy fonteine van vergifnis; Sy dou van genade faal nooit. Dit hou nooit op met vloei en droog nooit op nie. Dit is tot in ewigheid.

En dit is Sy woord, nie net vir vandag nie, maar vir elke dag.

Bly by die water xxx

Advertisements

‘n Tyd vir Alles

IMG_20150918_0023721Ek onthou dit goed (en ek dink my ma ook!) Hoeveel keer het sy nie baklei oor daai stoel nie! Maar dit was my stoel, my “clutter”, en ek was gemaklik daarmee want my gees en my gemoed was ook ge”clutter”….

Hoeveel keer lyk ons binnekante so? ‘n Warboel. “Clutter in your physical surroundings will clutter your mind and spirit.” Of andersom: “Clutter in your mind and spirit will also clutter your physical surroundings.”

“Clutter is a weight that has built on top of you so gradually, you don’t even realize anymore that it is holding you down.” (Mary Johanson).

Sodra dit vir ons begin voel dat dinge te veel raak, of dat die dinge wat ons ervaar te chaoties is, of dat ons in tien verskillende rigtings geskeur word, is dit ‘n teken dat ons moet “DEclutter” (of te ONT-warboel).

Haal DIEP asem, laat LOS, en laat GAAN.

Daar is ‘n vaste tyd vir alles, elke ding onder die son het sy tyd:

‘n tyd om gebore te word en ‘n tyd om te sterf.

‘n tyd om te plant en ‘n tyd om uit te ruk wat geplant is.

‘n tyd om dood te maak en ‘n tyd om gesond te maak.

‘n tyd om af te breek en ‘n tyd om op te bou.

‘n tyd om te lag en ‘n tyd om te huil.

‘n tyd om te treur en ‘n tyd om van vreugde te dans.

‘n tyd om jou saad te saai en ‘n tyd om jou saad terug te hou.

‘n tyd om te omhels en ‘n tyd om weg te bly van omhelsing.

‘n tyd om te soek en ‘n tyd om te verloor.

‘n tyd om op te pas en ‘n tyd om weg te gooi.

‘n tyd om te skeur en ‘n tyd om vas te werk.

‘n tyd om stil te bly en ‘n tyd om te praat.

‘n tyd om lief te hê en ‘n tyd om te haat.

‘n tyd vir oorlog en ‘n tyd vir vrede.

Watter voordeel is daar vir die een wat iets doen wat hom vermoei?

Prediker 3, NLV

Die groot “A”

AFTREDE.

Die rede hoekom hierdie onderwerp juis nou op my hart lê is omdat my en Riaan se ouers binnekort gaan wegtrek vir hulle aftrede; sy ouers Pretoria toe en myne Gouritsmond toe. Dis ver na albei kante toe. Aan die een kant is dit hartseer want dis lekker om ons ouers naby te hê, maar aan die anderkant is ons ook bly vir hulle want dis vir hulle ‘n nuwe hoofstuk in hulle lewens – en in ons s’n.

Kan kinders bekommerd wees oor hulle ouers? Natuurlik ja. Ek was bekommerd oor my ma-hulle, want anders as Riaan se ouers, trek hulle na ‘n stuk grond toe waar die huis nog gebou moet word…. En hulle trek oor twee weke, 22 Maart om presies te wees. Riaan en my stiefpa het klaar die donkies gevat (Braampie en Junior).

Die res van die gediertes trek oor twee weke saam (die budgies en hoenders; die kwakkers, kolgans, en kopereende; die potbelly vark, die hanskalf en hanslam; plus die vier honde!). So, die diere is half en half uitgesorteer, maar my ma-hulle gaan vir tyd en wyl in ‘n karavaan op die grond self moet bly terwyl die huis gebou gaan word.

Ek het aanvanklik my bedenkinge gehad. My ma word 70 die jaar en wie wil op daardie ouderdom nou gaan sit en sukkel met ‘n huisbouery en kampeer-leefstyl? Nie my ma nie. Alhoewel hulle in ‘n groot en luukse karavaan gaan bly, is sy nie ‘n kampeerder nie; en sy hou nie van sukkel nie. Vir haar gaan dit ‘n groot aanpassing wees; en soos met enige huisbouery is daar mos altyd vlieë in die salf en daar gebeur altyd dinge wat ‘n mens se planne laat dwars foeter.

Nietemin, ek het op die punt gekom waar ek vrede gemaak het met die idee en ek het net besluit dat, as my ma gelukkig is, en as sy vooruitsigte het, en as sy in haar elemente is oor hierdie skuif, wie is ek om te protesteer? Ek gun hierdie stukkie hemel vir haar, want sy het al swaar genoeg gekry in haar lewe. As daar iemand is vir wie ek dit gun, dan is dit sy. So Ma, ek is saam met Ma opgewonde en bly oor die nuwe begin op Plattebos. As dit die plek is waar Ma se siel gaan rus vind, dan berus ek my daarby.

Riaan se ouers is tans besig om vir hulle ‘n plekkie te soek in die stad. Hulle wil graag terugkeer na hul “roots”, waar die familie en naasbestaandes is; en waar Christa se graf is (Riaan se sussie wat twee jaar gelede aan Lupis oorlede is). As alles goed afloop behoort hulle ook binnekort te verhuis.

Maar op ‘n meer ernstige noot (en ek besef baie goed ek skryf hier as ‘n leek in die gebied), maar as werk die medium of platform is waar ons ‘n verskil kan maak, hoe moet ons na die konsep van aftrede kyk? Ons leef in ‘n kultuur wat die idee bevorder dat aftrede ‘n manier is om te onttrek van jou daaglikse arbeid sodat jy die lewe ten volle kan gaan geniet – sonder enige verantwoordelikheid of verpligting. Dus die mentaliteit van, ‘Ek kan doen wat ek wil en wanneer ek wil, dis my beloning na jare se harde werk‘.

Ek weet egter nie van enige een in die Bybel wat formeel ‘afgetree’ het behalwe die Levitiese priesters nie. In Numeri 8:23-25 sê God vir Moses dat die Leviete van die ouderdom van 25 af in die tabernakel moet werk; en na 50 moet hulle ophou. Dan mag hulle nie langer in die tabernakel werk nie. Maar dit stop nie daar nie. Hierdie afgetrede priesters het nie net opgepak en op die strande van Tel Aviv gaan leeglê nie. Al mag hulle nie langer in die tabernakel gewerk het nie, moes hulle raadgewers en adviseurs vir die jonger Leviete gewees het. Verder in die Bybel lees ons net van mense wat hulle lewens lank gewerk het tot die dag van hul dood.

Tree ‘n kind van God ooit af, of uit, sy of haar diensbaarheid vir God? Stellig nie. Terwyl mense van een seisoen na die volgende beweeg tydens aftrede, roep God hul steeds om te bly groei en om hul gawes en talente tot Sy beskikking te stel. Vir Christene moet aftrede ‘n tyd van nuwe en toenemende geleenthede wees om aan God diensbaar – en beskikbaar en gewillig vir diens – te bly.

Elkeen van ons moet besluit hoe ons die tyd uitkoop wat God vir ons gee. “Wees dus baie versigtig hoe julle lewe. Moenie soos dwase mense leef nie, leef wys!” vermaan Paulus. Gebruik elke geleentheid om die Here te dien. Vir baie mense bied aftrede nuwe geleenthede vir werk; hetsy dit betaald of onbetaald is…. Om iewers as ‘n vrywillige helper in te skakel; om in ‘n gebedsbediening te dien; om aan te hou as orreliste of om Sondagskool te onderrig; om aan te hou skryf aan jou blog of jou boek; om kinders op te pas of bejaardes te versorg; om ‘n besigheid te bedryf….. Over geset synde, daar lê ‘n inherente waardigheid in werk; en God roep ons om in Sy wingerde te arbei tot die dag wanneer Hy ons na ons hemelse huis toe roep.

So, aan my ouers en Riaan se ouers wil ek graag die volgende sê: Mag julle hierdie nuwe fase ingaan en die beste geniet wat die lewe vir julle bied. Mag julle altyd onthou dat julle nie uit julleself nie, maar alleen deur die Here se genade tot hier gekom het. Bly produktief. Bly getrou aan die roeping wat God vir julle gegee het. Hou aan om die goeie te doen. Moet nooit ophou om vir die Here te leef nie sodat julle ook soos Paulus aan die einde van jul lewenspad sal kan sê: “Ek het die goeie stryd gestry; ek het die wedloop voltooi; ek het die geloof behou”.

Xxx

Sterreprag

Sjoe, wat ‘n besige tyd! Busy busy busy! In Kathu vir ‘n kursus, die naweek plaastoe, Saterdag Kimberley toe saam met Ma, en werk tussenin. Mens se liggaam raak moeg, en ek is darem ook nou nie meer gister se kind nie. Liggaamlik en verstandelik raak ‘n mens soms moeg en tam, maar die vrede wat alle verstand te bowe gaan, is blywend…. En ek het dit een aand in Kathu tasbaar ervaar toe ek na ‘n tawwe dag op die bankie buitekant die hotel gaan sit het. Toe ek opkyk, toe sien ek die mooiste sterrehemel raak. Wég die gedagte van moegheid en tamheid. Ek het vir baie lank net stilgesit en gestaar…. En die eerste gedagte wat by my opgekom het:

O Heer my God, as ek in eerbied wonder en al U werke elke dag aanskou. Die son en maan, die aarde, sterre, wolke, hoe U dit elke dag so onderhou. Dan moet ek juig….

God se handewerk gee ‘n mens ‘n ondeurgrondelike blydskap. Daar is nie woorde om dit te beskryf nie. Ek het iewers gelees dat die aandster altyd met miswolke bedek is, en dat dit die lig is wat op die mis skyn, wat dit so mooi laat lyk.

Is dit nie ook waar van ons nie? Soms sak die miswolke ook op ons toe en omvou ons van alle kante, maar wanneer die son van God se liefde oor ons skyn, maak dit nie saak nie want dan verander ons miswolke in sterreprag.

My dogters, julle is ook my sterreprag blydskap en ek bid dat julle soos aand en oggendsterre in hierdie donker wêreld sal skyn.

Is dit nie ‘ n wonderlike gedagte nie, dat my dogters ook dieselfde maan en dieselfde sterrehemel as ek raaksien? Selfs die mense in die Bybel se tyd en die Here Jesus self het na dieselfde sterre gekyk waarna ek en jy ook kyk!

En nog ‘n wonderlike gedagte is dat sterre heeldag skyn. Soos wat hulle snags bo ons koppe verby beweeg, so ook bedags. Ons sien hulle egter eers as dit donker raak….

En hierin lê nog ‘n onbeskryflike wonder, maar dit moet elkeen van ons vir onsself ontdek.

Xxx

20180301_181831

Goeie dinge sal kom

Ek is besig om ou foto’s en kaartjies en goetertjies bymekaar te sit om ‘n collage daarvan op ‘n groot canvas te decoupage. Daar is een spesifieke plastiek lêer waarna ek gesoek het met my dogters se prentjies en briefies en kaartjies in wat ek bymekaar gemaak en gebêre het van kleuterskool se dae af. Ek kon dit nêrens kry nie. Ek het deur elke boks gesoek (my goed staan in bokse gestoor by my ma totdat ek ‘n groter huis kan kry), so dit was ‘n gesoek en ‘n gehuil en ‘n tyd van paniek. Ek kon alles verloor, net nie daardie lêer nie! Daarin is te veel sentiment en kosbare herinneringe…. Prentjies wat my kinders geteken en geverf of ingekleur het, briefies en kaartjies wat hulle vir my geskryf het, gebedjies…. Alles is daarin. Dis my kosbaarste besitting en ek kon nie bekostig om dit te verloor nie.

Ek was in ‘n toestand toe ek nie die lêer kon vind nie, en na ‘n paar weke, net toe ek alle hoop wou laat vaar en maar weer alles terugpak in die bokse, TA DA!! Binne-in ‘n dik kartonlêer ingeglip, daar het dit versteek gelê.

Hier is ‘n les iewers hierin, het ek agterna besef. Goeie dinge sal kom. Goeie dinge gebeur vir dié wat wag. Net toe ek op die punt was om moed op te gee, toe kom dit.

Maar ons moet nooit moed opgee nie, ons moet net leer om geduldig te wees. Wat ons nodig het, sal na ons toe kom wanneer die tyd reg is. Die Here is besig met ons, Hy is besig met ons situasies, en Hy doen nie halwe of afskeepwerk nie.

Maar dis nie maklik om te wag nie. Dis nie soos ‘n skakelaar wat ‘n mens net kan aan of afsit nie. Soms voel dit of jy van ‘n krans wil afspring, of in sak en as te gaan sit, maar ons moet onthou dat alle goeie dinge TYD, GEDULD, en die bereidwilligheid vat om deur alles te werk met God se genadehart vir ons.

Dit voel dalk vir jou of dinge sloer en of niks aan die gebeur is nie, sê Habbakuk, maar wees geduldig. Jy sal sien, kom sal dit kom en niks en niemand sal dit kan terughou nie. Xxx

39c0158c138d379e6f62f9f8cc7d1574--true-quotes-christian-quotes

Wat kan mense aan ons doen?

Baie. Mense kan baie aan ons doen. Dis die eerste ding wat ons dink as ons eerstehandse ervaring het van mense wat alles in hulle vermoë doen om ons in die grond in te trap, en die heeltyd daarop uit is om met ons in stryd en konflik te wees, en die lewe vir ons bitter moeilik maak; mense wat oneerlik en agterbaks is en alles verdraai wat ons sê en van ons leuenaars maak; mense wat letterlik dag in en dag uit sit en bedink wat hulle volgende kan doen om ons verder seer te maak…. En die ergste van als is, dit lyk of hulle altyd slaag in hul planne; of hul wegkom met alles. Dit voel of daar geen regverdigheid hoegenaamd is nie want die een wat seerkry is die een wat ten gronde gaan, maar die een wat seermaak bly staande.

Maar hierin lê ons grootste troos: God sluimer of slaap nie. Hy wéét van alles. Hy wéét van ons hartseer en pyn. Hy hou selfs boek van elke traan wat ons stort. Al lyk of voel dit nie so nie, Hy ís aan ons kant en Hy is in die proses om ons te help. As ons bang word, vat Hy ons hand net nog stywer vas en gee ons die gemoedsrus dat Hy by ons is. Ons kan en mag maar op Hom vertrou.

Daarom hoef ons nie bang te wees vir mense nie, want hulle kan niks aan ons doen nie! Hulle is per slot van rekening, nog kleiner en swakker en nietiger as diegene wat by die Here skuil. Hulle dink hulle is bó ons en bó wet en bó God verhewe, maar hulle misgis hulself lelik want die Here verhef elkeen wat by Hom skuiling soek, op ‘n hoë rots sodat wanneer ons teëstanders nader kom om ons te verslind, hulle oor hul eie bose planne struikel en val… “En nou sal my hoof hoog wees bo my vyande rondom my…”

Hulle sal uit een rigting kom om jou aan te val, maar hulle sal in sewe rigtings weghardloop!

Solank as wat die Here ons hulp is en ons saam met Hom op die pad van die lewe kan bly – al is dit soms hóé moeilik – en Hy ons aan die lewe hou, het ons niks om te vrees of voor bang te wees nie!

Xxx

(Skrifgedeeltes: Deut 28, Ps 27)

‘n Blye Boodskap

Een van my swakhede is dat ek vinnig opgewerk en frustreerd raak as dinge nie reg loop nie, of as dinge nie gou genoeg gebeur na my sin nie. As ek weer sien is ek sommer in ‘n slegte bui…. En wat dit eintlik veroorsaak is bekommernis en onsekerheid, en dit is giftig vir ‘n mens se gemoed want dit sit jou emosies op loop.

Gister het ek so ‘n emosioneel uitmergelende dag beleef by die werk; só dat ek totaal oormoeg, emosioneel belaaid en uitgeput by die huis gekom het. Ek was in die bui vir niks en niemand.

Dan om alles te kroon kom mens nog op daai punt van, nou hoe nou gemaak? Hoe hanteer ek dinge nou verder? Hoe gaan ek my finansies verder hanteer? Hoe gaan ek vorentoe maak? Want skielik gebeur daar dinge en alles tref jou met een slag. Jy raak verbouereerd en bekommerd en jy sit en tob oor dinge waaroor jy eintlik geen beheer het nie, maar op een of ander wyse moet jy dit máák werk, come hell or high water!

Dis wat vir my vanoggend so wonderlik is, hoe die Here met ‘n mens werk deur absoluut alles; maak nie saak hóé deurmekaar nie, maak nie saak wat alles deur jou kop jaag nie.

Of ons bid daaroor of nie, die Here staan altyd reg met ‘n antwoord. Toe ek vanoggend my dagstukkie oopmaak, toe kry ek hierdie ongelooflike stukkie vertroosting uit Filippense 4. Dit is so ‘n bekende gedeelte in die Bybel wat mens al so baie gelees het, maar dis asof dit juis vanoggend vir my nuwe betekenis het. Paulus kon dit netsowel in ‘n brief persoonlik aan my gerig het! My interpretasie van wat God vir my vanoggend wil sê uit Die Boodskap-vertaling is die volgende:

Eerstens, maak nie saak wat gebeur nie, BLY GETROU OP DIE PAD WAT DIE HERE VIR JOU WYS. Wees bly net oor die feit dat jy aan God behoort. Dít moet jou rede vir blydskap wees. Nie wat jy het of nie het nie. Nie wat jy kry of verloor nie. Maar die feit dat jy aan God behoort moet jou bron van vreugde wees.

Tweedens, moenie sit en tob oor dinge nie. Moenie bekommerd wees nie. PRAAT MET DIE HERE DAAROOR. Maak ‘n punt daarvan en bespreek dit met God. Moenie dinge in jou kop sit en probeer uitwerk nie. Moenie na mense toe hardloop nie. Gaan na die Here toe en vertel Hom in alle eerlikheid hoe jy voel. Hy weet die beste. Sê vir Hom dankie daarvoor!

Derdens, dink aan dinge waaroor God sal dink. Dinge wat ordentlik en reg is. Dinge wat vir Hom saakmaak. Dinge waarvan Hy hou. Dinge wat Hy sal sê goed is. Moenie jouself vergiftig met nuttelose gedagtes nie. DINK EN DOEN DINGE WAT DIE MOEITE WERD IS, en sorg dat dit altyd vir God in ‘n goeie lig stel want Hy los jou nooit nie. Hy bly altyd by jou.

Dan, wat maak dit saak of jy brandarm of skatryk is? Om te min of te veel te hê? Of dit swaar gaan of goed? LEER OM KLAAR TE KOM MET WAT JY HET. Moenie dat onbenullighede met jou kop smokkel en met jou emosies weghardloop nie. Wees tevrede met wat jy het en wat jy kry.

So, watookal jou tref, vir alles in die lewe – die goeie en die slegte – bly tevrede. Wees geduldig. Wees bly. Sien kans – omdat Jesus jou bron van krag is.

Xxx

Rejoice-In-The-Lord-Always-CANVAS

Gedagtes na die naweek

Oppad terug van Pretoria af. Woensdagmiddag uitgevlieg, ry vandag saam met Riaan se ma-hulle terug. Die pad is lank. Figuurlik gesproke ook, dink ek nou, na ouma Hannetjie se begrafnis Vrydag op Vaalwater in die NG Kerk. Nie my ouma nie, Riaan s’n. Die ouma wat hom grootgemaak het en wie se oogappel hy was. ‘n Relatief groot begrafnis, en ‘n aansienlik groot familie saamtrek…. die Kroch’s, Fourie’s, Stoops…. One big happy family. Dis wat ek die naweek ondervind het en dit was met tye nogal oorweldigend, ek is dit nie gewoond nie. Maar wat ek gesien het was hoe ‘n familie kan saamstaan, saamwerk, saamhuil, saamlag. Daar was nie tyd vir díé buitestaander om mensverskrik te wees nie, ek moes maar inval en inpas anders sou ek in die woer-war verlore raak.

Elke familie het maar sy vrot kol. Sy vlieg in die salf. En soos die sê-ding gaan, jy kan jou vriende kies maar nie jou familie nie. Nie dat ek noodwendig saamstem nie, mens het altyd ‘n keuse wie jy in jou familiekring toelaat.

dea5c4455ebf356c5611cf4b6b8b80f9--bad-family-quotes-quotes-about-family

Wat my geruk het van die begrafnis was twee dinge. Eerste, toe ek verlede week ouma Hannetjie se eulogie geskryf het namens Riaan se ma. Ek het so aan my eie dogters gedink en gewonder, hoe sal die eulogie wees wat hulle vir my op my begrafnis skryf? Sal hulle ooit op my begrafnis wees? Dit was ‘n gedagte wat my hart vasgegryp en angstig gemaak het, want Here, sal ek ooit in vrede kan rus sonder my dogters langs my sterfbed? Dis skrikwekkend, en hartseer, om aan te dink.

Die tweede gedagte was Vrydag na die begrafnis. Ek het aan my ma gedink, en vit haar ‘n whatsapp gestuur en gesê sy moet asb nog 60 jaar vasbyt – want ek weet nie of ek gereed sal wees om haar te ruste te lê nie. Ek weet nie hoe ek dit sal hanteer, en of ek die krag sal hê om dit te kan hanteer nie. Die afskeid, finaliteit, ewigheid. Dis scary.

Maar genoeg van die “heavies”, emosies het mos die neiging om 1000 maal vinniger as jou brein te werk! Môre is ‘n nuwe week met nuwe uitdagings en nuwe dinge. Ons kan uitsien na die dag van môre en kans sien vir die week wat voorlê, want ons is nog sterk en vol lewe. Ons het al die goeie dinge waarmee die Here ons oorlaai om te geniet. Hy gee ons krag om soggens op te staan; om in rus en tevredenheid saans te gaan slaap.

Dis die bril waardeur ek eerder graag wil kyk.

Xxx

 

Nóú is die tyd!

Ons was verlede week geweldig besig met ‘n “stop vir veiligheid” veldtog by die myn. Dit het geleentheid vir lynbestuurders en motiveringsprekers gebied om werkers opnuut bewus te maak om veilig te werk – #Safety is in your hands. Make every moment count.#

Soos ek sê, dit was ‘n besige week en daar was nie tyd vir ander dinge nie. Alle fokus en aandag en tyd was op hierdie veldtog toegespits…. Toe kry ons die tyding dat Riaan se ouma, aan wie hy baie na was, skielik siek geraak en Vrydag oorlede is. Sy word Vrydag wat kom begrawe. Ons vlieg Woensdagmiddag uit.

My ma se oogoperasie is vir Dinsdagmiddag in Kimberley geskeduleer. Ek weet nie of sy dalk sal moet oorbly of hoe laat hulle Dinsdagaand tuis gaan wees nie, maar ek moet reg wees om dalk plaastoe te ry na werk om te help met die diere se kosgee.

So, op heel ander vlakke, berei ek myself voor vir nog ‘n besige en deurmekaar week. Dis nie nou die tyd om geestelik anoreksies en emosioneel selfsugtig te wees nie!

In al die opgetekende geskiedenis is ek en jy strategies geplaas deur God – op hierdie spesifieke plek en tyd – want Hy het mense soos ek en jy nodig.

Gló jy dit? Ja, ek weet ons voel soms gebrekkig aan vermoëns. Die duiwel sê vir ons ons is misrabellik en mislukkings in vele opsigte, maar gló ons dit? Stellig nie!

Nóú is die tyd om ongeliefdes lief te hê; om vreugde te bring as dit koud en donker is; om vrede te openbaar in verwarrende situasies; om vriendelik te wees in ‘n onvriendelike, verwoestende, wrede kultuur; om optimisties te wees in frustrerende omstandighede; om te hoop – en hoop te gee – wanneer daar geen rede vir hoop is nie; om geduldig te wees met hardkoppige en humeurige mense; om moedeloses en neerslagtiges op te tel; om treurendes te troos….

Die beste deel is dat ons niks hiervan in eie krag en perspektief te probeer doen nie. Die Here gee ons die nodige krag, insig en wysheid. Hy stuur ons waar Hy ons nodig het. Hy gee die regte woorde en hulpmiddels op die regte tyd. Hy gee “sieraad vir as, vreugde-olie vir treurigheid, ‘n gewaad van lof vir ‘n verslae gees” (Jes 61:3).

Ons lewens is nie ons eie nie, ons is God se vakmanskap…. As ons kies om dit te wees. Dit bly altyd ons keuse: gaan ons op ons manier leef, of op God se manier? Gaan ons Sy krag ontvang vir Sy plan en doel, of gaan ons met ons eie krag voort ploeter?

Nóú is die tyd. Is jy in?

IMG-20180119-WA0008