Sondag Refleksie

Ek mag dalk nie verstaan hoe dinge gaan uitwerk nie; ek sien dalk nie die pad duidelik vorentoe nie, maar ek vertrou dat die Vader van beter weet en ek glo dat, op hierdie gegewe oomblik, is Hy besig om in lewens te werk, harte aan te raak, deure oop en toe te maak, die regte mense te gebruik, geleenthede…. Al lyk dit bleek en donker en onseker, ek móét glo dat die ligloosheid nie vir ewig sal duur nie. Dagbreek sal kom.

Xxx

Advertisements

Vlerke soos ‘n duif

Vanaand wens ek soos Dawid, dat ek maar vlerke het soos ‘n duif om weg te vlieg en rus te hê. Ek sou ver weg vlieg, ek sou in die woestyn gaan woon. Ek sou my haas om te ontvlug….

Wens jy ook soms so as jy moeg en uitgestres is na ‘n stresvolle dag? Of ‘n paar dae van frustrasies en irritasies? Dis dae wat ek om wens en dis nie reg nie want elke dag is ‘n dag wat die Vader gee; maar daar is regtig net tye wat ‘n mens voel jy kan wegvlieg.

Die woestyn was ‘n gunsteling plek vir profete en manne van ouds om God te gaan vind (alhoewel ek eerder ‘n verlate eiland sou verkies!) Dis ongelukig ‘n luuksheid wat ons nie het nie, om ‘n laaaaaaaang vakansie te neem weg van die normale en alledaagse….

Maar dis lekker om elke dag ‘n mini-retreat te kan hê – ‘n koppie koffie en die Skrif of ‘n goeie geestelike boek.

Dankie Here, vir klein eilandjies van verfrissing elke dag!

En om hierdie rede moet ons nie moed opgee nie. Elke oggend is die Vader se genade nuut, en elke aand kan ons met ‘n geruste hart gaan slaap want Hy sorg vir ons en Hy dra ons dag vir dag – selfs deur die storms.

Dalk is dit eerder nodig dat ons vlerke geknip word sodat ons kan leer om soos arende op die stormwinde te sweef; en nie soos duiwe weg te vlieg nie.

Xxx

Audioboek: Courageous Women of the Bible

Ek het hierdie audioboek so pas klaar geluister, geskryf en gelees deur Latan Roland Murphy.

Dis ‘n pragtige boek van elf dapper vrou in die Bybel, onder andere Debora, Abigail, Batseba, Maria, Jogebed, en meer. Elke hoofstuk beskryf die profiel van een van hierdie bybelse vroue; en dit vat jou nie net op ‘n reistog van geloof en dapperheid nie, dit leer jou ook hoe om dit toe te pas in jou eie lewe. En dit is vir my fenominaal van hierdie boek: ongeag die persoonlikheidsprofiele van die verskillende vroue, elkeen het ‘n les waaruit mens kan leer en die bybelse waarhede kan maklik deur jou eie situasies weef.

Net vir interessantheid, die woord “dapper” word gedefinieer as volg:

The ability to do something that frightens one

Strength in the face of pain or grief

Sinonieme daarvoor is: vreesloosheid, moed, stoerheid, durf, waagmoed, waaghalsig, vermetelheid, knars, heldhaftigheid

Regdeur ons lewens (sonder dat ons dit altyd besef), word ons opgeroep om dapperheid te toon; en dis glad nie maklik nie. Om die waarheid te sê, dis gewoonlik die tye wat vir ons die swaarste en hardste en moeilikste is; maar – en hier is waar die uitnemendheid lê – as ons ons vertroue in God plaas, gee Hy ons die krag en die moed om staande te bly.

Elke hoofstuk eindig met ‘n “Courage Quest”. Dis ‘n lys van vrae wat jou help om dieper te delf in die lewens van die vroue en in die Skrif. En alles is toepaslik, jy moet dit net jou eie maak.

Beslis ‘n boek wat ek sal aanbeveel. Dit bly beslis in my biblioteek vir toekomstige verwysing!

Boekgroete

Xxx

Die doel in doelwitte

Dis al amper einde Junie en ek wonder hoe ver trek mense met hul nuwejaarsvoornemens. Nie ek nie, ek doen nie sulke goed nie. Ek hou nooit daarby nie want die lewe verander te veel en te vinnig. So ek is een van die twee ekstreme as dit by doelwitte kom. Ek is een van diegene wat meestal verkies om nie groot doelwitte of planne te hê nie. Ek het, maar dis met uitsondering. Ek mik na niks, en tog behaal ek ook resultate soos enige ander meer doelgerigte mens in die lewe. Maar ek is meer die “let go and let God” tipe; en minder die intellek.

Die ander ekstreem, natuurlik, is die persoon wat so rigied is in sy besluitneming dat daar geen ruimte is vir ander invloed of leiding nie.

So, wat is nou eintlik die regte manier, om doelwitte te hê, of glad nie? Want aan die een kant skryf Jakobus dat ons nie weet wat die dag van môre vir ons inhou en wat in ons lewe gaan gebeur nie; maar aan die ander kant skryf Salomo weer dat mense wat planne maak, ryk word. Nou hoe nou? Die twee staan in kontras met mekaar; een impliseer om planne te maak is eintlik ‘n mors van tyd, en die ander een sê, gaan vir goud!

Tog sien ons regdeur die Bybel voorbeelde van hoe God sy mense gelei het in hulle besluitnemings. Hy was deel van die proses: van die beplanning tot die uitvoer van planne. Jona wat moes Nineve toe gaan maar aanvanklik nie daar uitgekom het nie. God het sy plannetjies sommer vinnig kortgeknip! Paulus wou gaan evangeliseer en gaan kerke plant, en dinge het nie altyd uitgewerk soos hy beplan het nie. Sy sendingreis Asië toe het nie gerealiseer nie omdat die Heilige Gees hom verhinder het om daar te gaan preek. Die Skrif sê: “Die Gees van Jesus het hulle nie toegelaat nie.” En dan weer kry ons vir Noag wat die lewens van sy familie en die diere in die ark van die vloed gered het. Lank vooruit beplan en stappe geneem om die Godgegewe doelwit te bereik. Josef wat vir Egipte en sy familie voorsiening getref het toe die hongersnood aangebreek het. Weereens, ‘n goeie intellek en goeie beplanning. Nehemia het vir die Israeliete van sekuriteit voorsien deur die muur rondom Jerusalem te herbou. Beplanning en doelwitte. Godgegewe, Godgesentreerd, deur God beïnvloed.

Dit sê vir my dat, wanneer ons planne en doelwitte het – nog voordat ons behoorlik daaraan dink – moet ons dit in lyn met God se wil kry. Ek dink nie Jakobus het bedoel dat ons glad nie mag doelwitte hê nie. Ek dink wat hy probeer sê is, ja, stel julle doelwitte en maak julle planne; maar moenie so onlosmaaklik rigied daarin vas wees nie. “Nee, julle moet sê: “As die Here wil hê dat dit moet gebeur, dan sal ons lewe en dan sal ons hierdie dinge doen” (Jak. 4:15). En hierin lê die balans. Al het Paulus doelwitte gehad, selfs Godgesentreerde doelwitte, was hy sensitief vir die leiding van die Heilige Gees. Hy het toegelaat dat die Here sy planne bestuur en verander soos Hy goeddink.

Dit is nou maar eenmaal so dat dinge vir ons ten goede sal uitwerk wanneer ons ons planne en ambisies en agendas vir God gee sodat Hy dit in lyn met Sy wil kan bring. Hy weet wat vir ons die beste is en Hy wil vir ons die beste hê. Hy begeer dat dit met ons goed gaan en nie sleg nie (Jer. 29:11); en ek praat nie hier noodwendig van sendingreise en kerke plant nie. Ek praat spesifiek uit die staanspoor van ‘n doodnormale, alledaagse lewe. Ons moet leer om God volkome te vertrou met al ons planne en doelwitte, en toelaat dat Hy ons sal lei en in Sy besluite gegrond sal hou.

Mag Hy vir ons die regte insigte gee wat ons elke dag nodig het.

Xxx

Waarop ons minder trots kan wees….

Die Here het ‘n sin vir humor, en eerbaar daarby om die minste daarvan te sê. Gister het ek gedink aan dinge waarop ek kan trots wees. Vanoggend in my stiltetyd, toe word ek teruggebring aarde toe met die dinge waarop ek nie so trots kan voel nie; en dis toe ek Filippense 4:8-9 lees in die Afrikaanse Bybelvertaling vir Almal (ABA): Dink aan alles wat mooi is en waarop jy kan trots wees.

Dink deurentyd die soort gedagtes waarop jy kan trots wees? Ja. “Center your mind on them [thoughts that are authentic and real, honorable and admirable, beautiful and respectful, pure and holy, merciful and kind], and implant them in your heart. Practice them in your daily life.” (Amp.)

Doen ons dit in die praktyk? Ongelukkig nie. Inteendeel, ek dink meeste van die tyd is die toestand van ons gedagtewêrelde glad nie so bewonderingswaardig soos ons goue lysies van trots nie!

Sien, ons kan uiterlik dinge doen waarop ons kan trots wees; waarop ander mense kan trots wees. Maar wanneer dit by die gedagte-wêreld kom waar niemand kan sien nie, dan verander die storie.

So wat sê ons nou, nog steeds breëbors? Ek dink nie so nie.

Wat egter diep uit ‘n mens se hart kom, maak die verskil en kan maak dat God niks daarvan hou nie. Want dit is van binne af, uit wat ‘n mens begeer, dat vuil gedagtes groei, soos om ander se goed te vat of jou seksueel sleg te gedra…. dinge soos moord, om ontrou te wees in die huwelik, om meer te begeer as wat jy het, om mense kwaad te wil aandoen en allerhande skelmstreke te beplan, om nie om te gee wat jy doen nie, of dit nou reg of verkeerd is, om jaloers te wees op ander mense, om lelik met en van ander mense te praat, om te veel van jouself te dink en nie jou plek te ken nie en sommer net ligsinnig te wees. Al hierdie dinge kom uit die binnekant van die mens – dit is dinge waarvan God nie hou nie en dit maak mense voor Hom onrein en onaanvaarbaar. Mark 7:20-23, DB

Dit som alles op, wat Jesus hierbo sê. Ons gedagtewêreld vorm die basis van van ons dade en woorde. Dit vorm ‘n groot deel van wie ons is, hoe en wat ons dink, hoe ons optree. Daarom is dit so belangrik vir ons om ‘Bybels’ oor alles te dink. En hoe is ‘Bybels’? Want sekerlik het ons ‘n stryd wat ons in ons gedagtes moet voer. Op een of ander wyse moet ons ons koppe regkry as ons op goeie voet met God wil bly. Maar hóé? Hoe weerstaan ek die slegte goed wat in my kop broei, wat ‘n impak op my daaglikse lewe het en my gedrag beïnvloed?

Dis eintlik heel eenvoudig en dis die wonderlike daarvan. Paulus sê eenvoudig, Vul julle gedagtes met alles wat waar, eerbaar, skoon, suiwer, lieflik en lofwaardig is (NLV). Met ander woorde, dink aan dit wat saakmaak, dinge wat ordentlik en reg is, dinge waaraan God sal dink (dit sal WOW wees!) en waarvan Hy sal hou, dinge wat God sal sê goed is. Kort en kragtig: Moenie jou tyd mors om aan allerhande nuttelose te sit en dink nie. Hou jouself besig met dinge wat die moeite werd is en wat saakmaak, dan sal jy nie sit en crap uitdink nie.

My uitkyk oor die hele storie van “trots wees op jouself” het ietwat versag na hierdie reality check. God het altyd maniere om ‘n mens gegrond te hou.

Xxx

Die Liggaams-eed

Ek beloof om te begin om my liggaam meer te waardeer en lief te hê – ongeag hoe ek voel en hoe ek lyk.

Ek sal ophou om negatief oor myself en my liggaam te praat en ek sal negatiewe gedagtes blokkeer en ignoreer. Nie alles wat ek oor myself dink of sê is waar nie.

Ek sal nie snedige aanmerkings maak oor hoe ander vrouens lyk of oor hulle liggaamsbou nie. Alle soorte liggaamsbou kan mooi wees as ‘n vrou gemaklik is met haarself en haarself aanvaar.

Ek beloof om mooi te kyk na myself; gesond te eet en gesond te leef.

Ek sal myself nie vergelyk met hoe ander vrouens lyk nie.

Ek sal my nie aan enige vorm van media steur nie. Hulle stel vals standaarde van hoe ‘n vrou behoort te lyk.

Ek beloof om meer te fokus op my sterk punte, wat ek bereik, en dat ek uniek is.

Ek beloof om nie so hard op myself en self-krities te wees nie. Wanneer ek ‘n fout maak, sal ek daaruit leer, dit agter my sit en aanbeweeg. Nie dae lank daaroor sit en tob nie.

Ek sal werk aan die minder goeie dinge in myself, maar ek hoef nie my persoonlikheid of my liggaam te verander vir enige iemand nie. Dié wat my nie aanvaar nie, is nie my vriendskap of geselskap of menswees werd nie!

Ek beloof om op te staan vir myself en vir ander wanneer ek lelike opmerkings hoor. Elke vrou verdien respek en liefde.

Ja, dit is U wat my gemaak het, ‘n mens wat kan voel en dink. U het my hele liggaam gemaak voordat ek gebore is. Psalms 139:13 ABA

Ek wil U prys omdat U my so volmaak geskep het. U doen wonderlike werk. Ek weet dat U groot dinge kan doen.

Daar is nie ’n been in my wat uit sy plek is nie. U ken my totaal. Alles is soos U dit wil hê. U het my gemaak. Psalms 139:14-15 DB

Die gedagte daaraan is heeltemal te groot om te verstaan, en ons hoef nie. Maar ons moet weet en aanvaar dat ons elkeen na God se hand en wil geskape is, tot in die fynste detail. Ons het ‘n verantwoordelikheid teenoor onsself en teenoor ander om ons liggame op te pas, geen skade aan te doen nie, en lief te hê. Dit is per slot van rekening nie ons eiendom nie, maar dit behoort aan Hom wat ons gemaak het. Mag ons ons liggame afsonder as instrumente in God se hand en tot Sy beskikking stel – van kop tot tone; al ons vermoëns – fisies en geestelik – en net doen wat Hy sê.

Xxx

Dit is my storie

Gister het ek ‘n paar random goed neergeskryf van wat ek graag ernstig aan wil werk. En ek wil. Regtig. Kan ‘n mens verander? Ek glo so, as jy wil. As jy toelaat dat die Here in jou hart en in jou lewe werk. Dit gee ons hoop: dat Hy die goeie werk wat Hy in ons begin het, enduit sal voer. En dis hartseer dat daar mense is wat dit nie glo nie; wat nie kan glo dat die Here iemand se hart en se lewe kan verander nie. Hulle worstel met die lelike dinge in hulleself – die lelike dinge wat maar inherent in elkeen van ons is – en dan gaan soek hulle dit in ander mense se lewens, maar hulle kom nooit op die punt om te aanvaar en te glo dat God in staat is om iemand te kan verander nie. Want hulle is nie bereid om te verander nie. Dis wie ek is. Kruidjie-roer-my-nie.

Dis jammer. Want God is vasberade om lewens te verander, en Hy wil dit graag doen. Elke mens worstel met die lelik van een of ander sonde in hul lewens. Party mense dink hulle is volmaak, maar hulle misgis hulself lelik. Ek is onlangs vertel dat ek leuens hier skryf en dat my ‘aanhangers’ my nie meer sal jammer kry as hulle die waarheid sou weet nie. Want dis hoekom mens blykbaar blog, om aanhangers te werf en sensasie te soek. Sien, die ding is, ek is nie bang vir die waarheid nie. Ek het niks om weg te steek nie. Soos ek sê, elke mens worstel met goggas in hul binneste. Elke mens het ‘n geraamte of twee in die kas. Hier is myne: Vir jare het ek geworstel met ‘n soeke na aanvaarding en goedkeuring van mense. Dit was my grootste swakheid in die lewe, van jongs af. Ek wou méér wees in die lewe; en dit het gelei daartoe dat ek my oorgegee het aan seksuele losbandigheid wat gepaard gegaan het met buite eglike verhoudings en aanlyn verhoudings. Ek wou net sosiaal aanvaarbaar wees en het liefde gesoek. Op totaal die verkeerde maniere en plekke. Dit was deurlopend aan en af in my lewe. Partymaal het dit goed gegaan vir lank, ander tye het ek geswig en geval. Dit was ‘n sielkundige ding wat ek moes oorkom het.

Dit was toe, en nou’s ek hier. Dis verby. Was gewees. Vandag kan ek terugkyk en sê, ek is baie diep uitgehaal en dit sit my in die regte posisie waar ek as instrument gebruik kan word om vir ander mense op grond van my slegte ervaringe te kan help. Jy kan nie iemand anders wil help as jy nie self deur so ‘n situasie was nie want jy het geen verwysingsraamwerk nie. Ek troos my daaraan, God het my gered uit die diepste van donker en vuil dieptes. Hy verwyder ons oortredinge so ver as die ooste van die weste en gooi dit in die dieptes van die see om nooit weer daaraan te dink nie. So mense kan my vandag beskuldig dat ek ‘n hoer is, dis okei. Ek is goed bekend met die lewe wat ek gelei het. Ragab was ook ‘n hoer, en God het haar gered. So ook die vrou by die put wat baie mans in haar lewe gehad het waarvan nie een haar eie was nie. Jesus het haar oë oopgemaak en haar siel gered. Die onsedelike vrou wat die Fariseërs wou gestenig het, het Jesus gered. Nog ‘n seksueel onreine vrou het Sy voete met haar hare en kosbare olie ingevryf. Hy het haar siel ook gered. Sien, God is in die besigheid van verlossing en transformasie. Dis Sy spesialiteit. En Hy doen nie halfhartige werk nie.

Van tyd tot tyd in ons lewens is daar areas waarmee ons sukkel; areas wat ons wens kon anders gewees het. Maar weet jy wat? Die Here bring ons op plekke in ons lewens en in situasies waar ons hierdie donker areas moet benader; waar ons ‘n weg moet vind om te wil verander. Dit is wat God se genade doen: dit bring ‘n kragtige verandering in ‘n mens se hart en se lewe. Ongetwyfeld. En wat is genade? Joseph Cooke het dit mooi beskryf, hy sê: Grace is nothing more nor less than the face that love wears when it meets imperfection, weakness, failure, sin. Dis daardie kwaliteit van God wat maak dat Hy nie met ons reken volgens ons sondes nie; wat maak dat Hy hom nie op ons wreek volgens ons oortredinge nie. Dit is God se getrouheid. Hy bly getrou, al is ons ontrou. Dit is wat liefde is; wat liefde behoort te wees: To love the unlovely, the weak, the inadequate, the undeserving, and the despicable. Onverdiende genade.

Ek is die laaste een wat dit verdien het, maar ek moes deur die vuur en die vloed gegaan het om daar te kom en Sy genade te kon ontvang. Niemand hoef dit te glo nie, maar dit was – is – lewensveranderend. Ons het God se genade die meeste nodig die oomblik wanneer ons bewus word van sekere aspekte in ons lewens wat verkeerd is. Ja, ons elkeen het ‘n goeie kant en ‘n slegte kant. En dan het ons daardie kant wat ons liewer wil wegsteek; die dinge waarvoor ons skaam is. Op grond hiervan beoordeel die wêreld ons. Hulle aanvaar ons op grond van ons goeie kant, en verwerp ons op grond van ons slegte kant. Maar nie God nie. Hy is nie so nie. Sy gedagtes is nie ons gedagtes nie. Hy kyk nie na die een of die ander kant nie. Hy aanvaar ons as ‘n geheel, net soos ons is. Nie as ‘n gesplete persoonlikheid nie. En dit maak nie saak hoeveel keer ons op ons eie probeer om ons slegte dele beter te maak nie, ons kan nie. Nie op ons eie nie. Dit sal nooit goed genoeg wees nie want God is volmaak. Daarom moet ons al ons dele – goed en sleg – vir Hom gee sodat Hy ons kan heel maak.

Party dinge wat met ‘n mens gebeur is net aaklig sleg, maar ons moet aanhou lewe, en aanhou met ons lewens aangaan, en weer sin vind. En aanhou bid vir hulle wat ons haat, want as hulle bly vasklou en vaskyk in die verlede en dink ons is die oorsaak van al die sleg in hulle lewens, lê daar vir hulle net benardheid in hulle lewens voor. Maar ek kan nie. Ek weet wat ek was en ek weet waar ek nou is. Ebenhaeser: tot hiertoe het God my gelei. Hy het nie die rooi see weggevat nie, Hy het dit oopgemaak. Hy het nie verby die tuin van Getsemane gegaan nie, Hy het daardeur gegaan vir iemand soos ek.

Slotsom is dit: Kry God se shalom vrede in jou hart. Jy is in Sy hande. Elke saak is in Sy hande. Hy voorsien op die ongelooflikste maniere; en stuur mense en situasies op jou pad wat jou elke dag bekragtig. Met tye voel ons oorweldig, maar dan kom Hy en maak alles stil in ons. Soms kry ons wysheid wat nie ons s’n nie. Hy verander ons, want Hy is lewend. Hy is in beheer met elke situasie wat ‘n mens deur gaan. Hy gee die vrede en die uitkoms gee. Skep goeie moed!

My hartsvriendin het vir my hierdie kosbare woord gegee: Kom iemand met die verlede se sondes, selfs huidige tekortkominge en gooi dit teen jou, dan sê God, sy is witter as sneeu. As ons ons sondes bely het en God ons vergeef het, kan die duiwel maar los. Geen verlede sonde word jou weer toegereken nie. Nie jou twyfel nie, nie jou sonde nie, niks nie. Mits jy dit bely en laat staan het. Die borswapen van geregtigheid. Dis soos jou Rots, dit beskerm jou teen alle bose aanvalle. Hy doen die werk in jou, saam met jou. En dis ‘n lewenslange proses. Dit vat tyd. Wat God in jou wil verander sal Hy verander, op Sy tyd en manier. Daarom, aantuigings, beskuldigings, ensovoorts maak nie meer saak nie. God sal die goeie werk wat Hy in jou begin het, enduit voer. Hy vorm ons dan op maniere wat Hy goeddink. Jy is nou Sy eiendom, klei in Sy hande. Daarom kan jy Hom vertrou.

 

 

 

‘n Onsterflike versiering

Vrou-wees is nie ‘n grap nie. Ouer word ook nie. Dit kom met soveel uitdagings en veranderinge, die hemel weet, om by te bly vandag is ‘n enorme taak! Dis ‘n crispy-besigheid dié want alles wat kan kraak, kraak; en alles wat kan plooi, die plooi.

Ek en Riaan volg elke week die mooimaak program, Glam Guru – “Mooimaak in ‘n botteltjie of buisie”, soos Hannon sal sê. Ek hou van sy programme, hy gee lekker mooimaak wenke wat prakties is vir elke dag se gebruik. Daar is deesdae ‘n hele paar sulke mooimaak programme wat meer goed behels soos suurstof inspuitings en chemiese afskilfering en laserbehandeling…. Dis nie vir my nie, maar ek haal my hoed af vir vroue wat kans sien daarvoor.

Maar as ‘n mens mooi dink daaroor en jy jouself die vraag afvra: Waarop maak jy staat om jouself mooi te laat lyk? Dan kom gedagtes na vore soos mooi klere, grimering, juwele, ‘n moderne haarstyl, akriel of gel naels met naelkuns op, getattoeërde wenkbroue, ens. Party van ons probeer ‘n gesonde leefstyl handhaaf, ander spandeer geld op skoonheidsprodukte en behandelings. Elke vrou het maar haar goedjies en grilletjies wat sy vir haarself doen om mooi te lyk.

Mooi was nog nooit lelik nie, maar maak dit regtig saak as ons uiterlike voorkoms dag na dag stadig besig is om te vergaan?

Ek glo dis die punt wat Petrus by die vroue in sy tyd probeer tuisbring het in 1 Petrus 3:4-5. Hulle het in die era van die Romeinse ryk geleef en in daardie tyd was vroue blykbaar baie behep met hulle hare. Glo dit of nie, maar hulle het toe ook al hare gekleur en hulle was lief daarvoor om pruike te dra, veral blonde pruike.

Nie dat daar enigsins iets verkeerd daarmee was nie. Petrus het nie gesê hulle mag nie so lyk nie. Hy het nie uiterlike versierings verbied, of gesê vroue mag nie hul hare mooi maak of juwele dra of mooi klere aantrek nie. Nee. Wat hy wel in sy brief aan medegelowiges probeer oordra het, is dat Christen-vroue se uiterlike versierings in matigheid behoort te wees. ‘n Christen-vrou se fokus en prioriteit behoort altyd op die versiering van die innerlike te wees, en nie die uiterlike nie. Vir Petrus was dít wat mense van buite af kon raaksien, nie ware skoonheid nie. Hy het ware skoonheid geag as dít wat van binne af uit kom: wie jy is, nie wat jy in ‘n spieël kan raaksien en optof nie.

In vandag se terme sou Petrus ook nie uiterlike versierings verbied het nie, maar hy sou wel by sy standpunt gebly en dit beklemtoon het dat ‘n vrou se mooiste eienskappe nie uiterlik van aard is. Haar innerlike versiering moet die bron van haar ware skoonheid wees:

Die onverganklike versiering van ‘n sagmoedige en stille gees….

Innerlike skoonheid is blywend. Niemand kan dit van jou af wegvat nie. Dit verouder nie. Dit kan nie vergaan of uitsterf nie. Inteendeel, onverganklike skoonheid raak net beter hoe ouer jy word. Soos goeie wyn; en goeie wyn het nie ‘n krans nodig nie, sê die spreekwoord. Innerlike skoonheid is baie meer waardevol as die dinge wat uiterlike skoonheid bevorder; en iets wat goed is hoef nie geprys te word nie.

Petrus beskryf die karakter van ware skoonheid as “‘n sagmoedige en stille gees”. Dit beteken om sag en vriendelik te wees. Beskeie. Om ‘n kalm en rustige gemoed te handhaaf. To be calm and self-controlled; not overanxious; but serene and spiritually mature (Amplified).

Dis ironies dat hierdie karaktertrekke nêrens vandag in ons kultuur aangemoedig of bevorder word nie…. En tog is dit baie kosbaar vir God.

Petrus se brief aan vroue duisende jare gelede, is vandag nog net so relevant. Ongeag die verskil in eras eeue uitmekaar, die beginsel staan vas soos God se Woord altyd vas bly staan: Mense oordeel volgens uiterlike voorkoms, maar die Here kyk na die binnekant.

Nie wat die mens sien, sien God nie, want die mens sien aan wat voor oë is, maar die Here sien die hart aan (1 Sam 16:7).

Hemelse Vader, ons kom voor U – nie net as vroue nie, maar ook as U dogters; en ons bring ook ons dogters en hulle dogters voor U. Gee dat ons nie spandabelrig sal wees en ons tyd en geld uitbundig sal spandeer op nuttelose en waardelose dinge nie; maar dat ons onsself sal beklee met die onverganklike wat die hart versier en ons sal mooi maak van binne af. Help ons om ons harte en ons denke in orde te kry en in lyn met U woord; sodat wanneer die versoekings ons wil oorval met gedagtes en begeertes na die maatstawwe van die wêreld daarbuite, dat ons die regte keuses sal maak. Amen

Versoekings lyk altyd aantreklik en mooi toegedraai in kortstondige beloftes van self-tevredenheid; self-liefde; self-voldaanheid; self-verheffing; self-bewondering…. Maar ons het nie hierdie dinge nodig om ons te klassifiseer nie. Die Here gee vir ons iets wat baie meer waardevol is; wat tydloos en onsterflik is: die onverganklike versiering vann sagmoedige en stille gees; en in Sy oë is dit die kosbaarste juwele wat ‘n vrou kan dra.

xxx

Amen & Koebaai

Ek kry vanoggend die stukkie op whatsapp en dit is so besonders. Mag dit vir iemand anders ook iets beteken xxx

Amen en koebaai…

Ek weet nie van jou nie, maar ek het twee soorte bid in my lewe: die een is sommer die gewone praat met God, geliefdes voor Sy voete lê, Hom aanbid vir Sy liefde en sorg, en dan opstaan en die dag voluit aanpak… En dan is daar die amen en koebaai bid. Daardie oggende wat jou bid nie woorde wil kry nie, en sommer net rou emosie is: verlang wat te veel word, vrees vir dinge wat wag, hartseer oor dinge wat gebeur het. En as mens so voor die Here ‘voel’, wil mens nie amen sê nie. Want amen voel partydae soos koebaai, so al asof jy en God julle eie koers gaan inslaan, tot die volgende gebed natuurlik. Op sulke dae klou jy wanhopig aan die Here vas, weet jy met kinderlike geloof dat die Here jou nie mag los nie. Nie op daardie oomblik nie. Nooit nie.

Iemand het eendag gesê dat mens soms moet bid, en ander kere net moet toelaat dat die Here jou liefhê… Op amen en koebaai dae, mag jy maar net stil by Hom sit en Hom vra om vir jou lief te wees. Op amen en koebaai dae, mag jy jou oë toemaak en in jou gedagtes voel hoe die Here jou styf vashou. Op amen en koebaai dae mag jy maar jou kop teen Sy bors laat sak, en jou huile huil. Op amen en koebaai dae maak dit nie saak of jy amen sê nie, want die Een wat jou naam in Sy handpalm geskryf het, het gesê: “Moenie bang wees nie (nie vir die hartseer van verlang na n geliefde nie, nie vir die spoke van die verlede of die uitdagings wat voorlê nie), want Ek is by jou. Altyd.”

Amen & Koebaai

Ek kry vanoggend die stukkie op whatsapp en dit is so besonders. Mag dit vir iemand anders ook iets beteken xxx

Amen en koebaai…

Ek weet nie van jou nie, maar ek het twee soorte bid in my lewe: die een is sommer die gewone praat met God, geliefdes voor Sy voete lê, Hom aanbid vir Sy liefde en sorg, en dan opstaan en die dag voluit aanpak… En dan is daar die amen en koebaai bid. Daardie oggende wat jou bid nie woorde wil kry nie, en sommer net rou emosie is: verlang wat te veel word, vrees vir dinge wat wag, hartseer oor dinge wat gebeur het. En as mens so voor die Here ‘voel’, wil mens nie amen sê nie. Want amen voel partydae soos koebaai, so al asof jy en God julle eie koers gaan inslaan, tot die volgende gebed natuurlik. Op sulke dae klou jy wanhopig aan die Here vas, weet jy met kinderlike geloof dat die Here jou nie mag los nie. Nie op daardie oomblik nie. Nooit nie.

Iemand het eendag gesê dat mens soms moet bid, en ander kere net moet toelaat dat die Here jou liefhê… Op amen en koebaai dae, mag jy maar net stil by Hom sit en Hom vra om vir jou lief te wees. Op amen en koebaai dae, mag jy jou oë toemaak en in jou gedagtes voel hoe die Here jou styf vashou. Op amen en koebaai dae mag jy maar jou kop teen Sy bors laat sak, en jou huile huil. Op amen en koebaai dae maak dit nie saak of jy amen sê nie, want die Een wat jou naam in Sy handpalm geskryf het, het gesê: “Moenie bang wees nie (nie vir die hartseer van verlang na n geliefde nie, nie vir die spoke van die verlede of die uitdagings wat voorlê nie), want Ek is by jou. Altyd.”