Die Liggaams-eed

Ek beloof om te begin om my liggaam meer te waardeer en lief te hê – ongeag hoe ek voel en hoe ek lyk.

Ek sal ophou om negatief oor myself en my liggaam te praat en ek sal negatiewe gedagtes blokkeer en ignoreer. Nie alles wat ek oor myself dink of sê is waar nie.

Ek sal nie snedige aanmerkings maak oor hoe ander vrouens lyk of oor hulle liggaamsbou nie. Alle soorte liggaamsbou kan mooi wees as ‘n vrou gemaklik is met haarself en haarself aanvaar.

Ek beloof om mooi te kyk na myself; gesond te eet en gesond te leef.

Ek sal myself nie vergelyk met hoe ander vrouens lyk nie.

Ek sal my nie aan enige vorm van media steur nie. Hulle stel vals standaarde van hoe ‘n vrou behoort te lyk.

Ek beloof om meer te fokus op my sterk punte, wat ek bereik, en dat ek uniek is.

Ek beloof om nie so hard op myself en self-krities te wees nie. Wanneer ek ‘n fout maak, sal ek daaruit leer, dit agter my sit en aanbeweeg. Nie dae lank daaroor sit en tob nie.

Ek sal werk aan die minder goeie dinge in myself, maar ek hoef nie my persoonlikheid of my liggaam te verander vir enige iemand nie. Dié wat my nie aanvaar nie, is nie my vriendskap of geselskap of menswees werd nie!

Ek beloof om op te staan vir myself en vir ander wanneer ek lelike opmerkings hoor. Elke vrou verdien respek en liefde.

Ja, dit is U wat my gemaak het, ‘n mens wat kan voel en dink. U het my hele liggaam gemaak voordat ek gebore is. Psalms 139:13 ABA

Ek wil U prys omdat U my so volmaak geskep het. U doen wonderlike werk. Ek weet dat U groot dinge kan doen.

Daar is nie ’n been in my wat uit sy plek is nie. U ken my totaal. Alles is soos U dit wil hê. U het my gemaak. Psalms 139:14-15 DB

Die gedagte daaraan is heeltemal te groot om te verstaan, en ons hoef nie. Maar ons moet weet en aanvaar dat ons elkeen na God se hand en wil geskape is, tot in die fynste detail. Ons het ‘n verantwoordelikheid teenoor onsself en teenoor ander om ons liggame op te pas, geen skade aan te doen nie, en lief te hê. Dit is per slot van rekening nie ons eiendom nie, maar dit behoort aan Hom wat ons gemaak het. Mag ons ons liggame afsonder as instrumente in God se hand en tot Sy beskikking stel – van kop tot tone; al ons vermoëns – fisies en geestelik – en net doen wat Hy sê.

Xxx

Advertisements

Dit is my storie

Gister het ek ‘n paar random goed neergeskryf van wat ek graag ernstig aan wil werk. En ek wil. Regtig. Kan ‘n mens verander? Ek glo so, as jy wil. As jy toelaat dat die Here in jou hart en in jou lewe werk. Dit gee ons hoop: dat Hy die goeie werk wat Hy in ons begin het, enduit sal voer. En dis hartseer dat daar mense is wat dit nie glo nie; wat nie kan glo dat die Here iemand se hart en se lewe kan verander nie. Hulle worstel met die lelike dinge in hulleself – die lelike dinge wat maar inherent in elkeen van ons is – en dan gaan soek hulle dit in ander mense se lewens, maar hulle kom nooit op die punt om te aanvaar en te glo dat God in staat is om iemand te kan verander nie. Want hulle is nie bereid om te verander nie. Dis wie ek is. Kruidjie-roer-my-nie.

Dis jammer. Want God is vasberade om lewens te verander, en Hy wil dit graag doen. Elke mens worstel met die lelik van een of ander sonde in hul lewens. Party mense dink hulle is volmaak, maar hulle misgis hulself lelik. Ek is onlangs vertel dat ek leuens hier skryf en dat my ‘aanhangers’ my nie meer sal jammer kry as hulle die waarheid sou weet nie. Want dis hoekom mens blykbaar blog, om aanhangers te werf en sensasie te soek. Sien, die ding is, ek is nie bang vir die waarheid nie. Ek het niks om weg te steek nie. Soos ek sê, elke mens worstel met goggas in hul binneste. Elke mens het ‘n geraamte of twee in die kas. Hier is myne: Vir jare het ek geworstel met ‘n soeke na aanvaarding en goedkeuring van mense. Dit was my grootste swakheid in die lewe, van jongs af. Ek wou méér wees in die lewe; en dit het gelei daartoe dat ek my oorgegee het aan seksuele losbandigheid wat gepaard gegaan het met buite eglike verhoudings en aanlyn verhoudings. Ek wou net sosiaal aanvaarbaar wees en het liefde gesoek. Op totaal die verkeerde maniere en plekke. Dit was deurlopend aan en af in my lewe. Partymaal het dit goed gegaan vir lank, ander tye het ek geswig en geval. Dit was ‘n sielkundige ding wat ek moes oorkom het.

Dit was toe, en nou’s ek hier. Dis verby. Was gewees. Vandag kan ek terugkyk en sê, ek is baie diep uitgehaal en dit sit my in die regte posisie waar ek as instrument gebruik kan word om vir ander mense op grond van my slegte ervaringe te kan help. Jy kan nie iemand anders wil help as jy nie self deur so ‘n situasie was nie want jy het geen verwysingsraamwerk nie. Ek troos my daaraan, God het my gered uit die diepste van donker en vuil dieptes. Hy verwyder ons oortredinge so ver as die ooste van die weste en gooi dit in die dieptes van die see om nooit weer daaraan te dink nie. So mense kan my vandag beskuldig dat ek ‘n hoer is, dis okei. Ek is goed bekend met die lewe wat ek gelei het. Ragab was ook ‘n hoer, en God het haar gered. So ook die vrou by die put wat baie mans in haar lewe gehad het waarvan nie een haar eie was nie. Jesus het haar oë oopgemaak en haar siel gered. Die onsedelike vrou wat die Fariseërs wou gestenig het, het Jesus gered. Nog ‘n seksueel onreine vrou het Sy voete met haar hare en kosbare olie ingevryf. Hy het haar siel ook gered. Sien, God is in die besigheid van verlossing en transformasie. Dis Sy spesialiteit. En Hy doen nie halfhartige werk nie.

Van tyd tot tyd in ons lewens is daar areas waarmee ons sukkel; areas wat ons wens kon anders gewees het. Maar weet jy wat? Die Here bring ons op plekke in ons lewens en in situasies waar ons hierdie donker areas moet benader; waar ons ‘n weg moet vind om te wil verander. Dit is wat God se genade doen: dit bring ‘n kragtige verandering in ‘n mens se hart en se lewe. Ongetwyfeld. En wat is genade? Joseph Cooke het dit mooi beskryf, hy sê: Grace is nothing more nor less than the face that love wears when it meets imperfection, weakness, failure, sin. Dis daardie kwaliteit van God wat maak dat Hy nie met ons reken volgens ons sondes nie; wat maak dat Hy hom nie op ons wreek volgens ons oortredinge nie. Dit is God se getrouheid. Hy bly getrou, al is ons ontrou. Dit is wat liefde is; wat liefde behoort te wees: To love the unlovely, the weak, the inadequate, the undeserving, and the despicable. Onverdiende genade.

Ek is die laaste een wat dit verdien het, maar ek moes deur die vuur en die vloed gegaan het om daar te kom en Sy genade te kon ontvang. Niemand hoef dit te glo nie, maar dit was – is – lewensveranderend. Ons het God se genade die meeste nodig die oomblik wanneer ons bewus word van sekere aspekte in ons lewens wat verkeerd is. Ja, ons elkeen het ‘n goeie kant en ‘n slegte kant. En dan het ons daardie kant wat ons liewer wil wegsteek; die dinge waarvoor ons skaam is. Op grond hiervan beoordeel die wêreld ons. Hulle aanvaar ons op grond van ons goeie kant, en verwerp ons op grond van ons slegte kant. Maar nie God nie. Hy is nie so nie. Sy gedagtes is nie ons gedagtes nie. Hy kyk nie na die een of die ander kant nie. Hy aanvaar ons as ‘n geheel, net soos ons is. Nie as ‘n gesplete persoonlikheid nie. En dit maak nie saak hoeveel keer ons op ons eie probeer om ons slegte dele beter te maak nie, ons kan nie. Nie op ons eie nie. Dit sal nooit goed genoeg wees nie want God is volmaak. Daarom moet ons al ons dele – goed en sleg – vir Hom gee sodat Hy ons kan heel maak.

Party dinge wat met ‘n mens gebeur is net aaklig sleg, maar ons moet aanhou lewe, en aanhou met ons lewens aangaan, en weer sin vind. En aanhou bid vir hulle wat ons haat, want as hulle bly vasklou en vaskyk in die verlede en dink ons is die oorsaak van al die sleg in hulle lewens, lê daar vir hulle net benardheid in hulle lewens voor. Maar ek kan nie. Ek weet wat ek was en ek weet waar ek nou is. Ebenhaeser: tot hiertoe het God my gelei. Hy het nie die rooi see weggevat nie, Hy het dit oopgemaak. Hy het nie verby die tuin van Getsemane gegaan nie, Hy het daardeur gegaan vir iemand soos ek.

Slotsom is dit: Kry God se shalom vrede in jou hart. Jy is in Sy hande. Elke saak is in Sy hande. Hy voorsien op die ongelooflikste maniere; en stuur mense en situasies op jou pad wat jou elke dag bekragtig. Met tye voel ons oorweldig, maar dan kom Hy en maak alles stil in ons. Soms kry ons wysheid wat nie ons s’n nie. Hy verander ons, want Hy is lewend. Hy is in beheer met elke situasie wat ‘n mens deur gaan. Hy gee die vrede en die uitkoms gee. Skep goeie moed!

My hartsvriendin het vir my hierdie kosbare woord gegee: Kom iemand met die verlede se sondes, selfs huidige tekortkominge en gooi dit teen jou, dan sê God, sy is witter as sneeu. As ons ons sondes bely het en God ons vergeef het, kan die duiwel maar los. Geen verlede sonde word jou weer toegereken nie. Nie jou twyfel nie, nie jou sonde nie, niks nie. Mits jy dit bely en laat staan het. Die borswapen van geregtigheid. Dis soos jou Rots, dit beskerm jou teen alle bose aanvalle. Hy doen die werk in jou, saam met jou. En dis ‘n lewenslange proses. Dit vat tyd. Wat God in jou wil verander sal Hy verander, op Sy tyd en manier. Daarom, aantuigings, beskuldigings, ensovoorts maak nie meer saak nie. God sal die goeie werk wat Hy in jou begin het, enduit voer. Hy vorm ons dan op maniere wat Hy goeddink. Jy is nou Sy eiendom, klei in Sy hande. Daarom kan jy Hom vertrou.

 

 

 

Dinge waaraan ek móét werk

Aan myself:

Leer om nee te sê. Stel jou perke duidelik. Jy het niks om oor skuldig te voel nie.

Jy kan nie bitter wil wees en verwag jou lewe moet soet wees nie.

Om jou tong in toom te hou is nie die probleem nie. Dis jou gesigsuitdrukking wat jou weggee.

Moet nooit toelaat dat jou emosies jou intelligensie beïnvloed nie. Bly rasioneel en kalm, ongeag die situasie. Bly altyd bó die situasie.

Jy kan ure, weke, maande, jare spandeer om alles te oor-analiseer en die stukke aanmekaar te probeer sit; te regverdig wat kon gewees en kon gebeur het…. Dit help nie. En dis nie jou werk nie.

Alles in die lewe gaan nie verloop soos jy dit wil hê nie. So verwag eerder niks en gaan saam met die vloei van die lewe.

Smile and wave!! 👋

‘n Onsterflike versiering

Vrou-wees is nie ‘n grap nie. Ouer word ook nie. Dit kom met soveel uitdagings en veranderinge, die hemel weet, om by te bly vandag is ‘n enorme taak! Dis ‘n crispy-besigheid dié want alles wat kan kraak, kraak; en alles wat kan plooi, die plooi.

Ek en Riaan volg elke week die mooimaak program, Glam Guru – “Mooimaak in ‘n botteltjie of buisie”, soos Hannon sal sê. Ek hou van sy programme, hy gee lekker mooimaak wenke wat prakties is vir elke dag se gebruik. Daar is deesdae ‘n hele paar sulke mooimaak programme wat meer goed behels soos suurstof inspuitings en chemiese afskilfering en laserbehandeling…. Dis nie vir my nie, maar ek haal my hoed af vir vroue wat kans sien daarvoor.

Maar as ‘n mens mooi dink daaroor en jy jouself die vraag afvra: Waarop maak jy staat om jouself mooi te laat lyk? Dan kom gedagtes na vore soos mooi klere, grimering, juwele, ‘n moderne haarstyl, akriel of gel naels met naelkuns op, getattoeërde wenkbroue, ens. Party van ons probeer ‘n gesonde leefstyl handhaaf, ander spandeer geld op skoonheidsprodukte en behandelings. Elke vrou het maar haar goedjies en grilletjies wat sy vir haarself doen om mooi te lyk.

Mooi was nog nooit lelik nie, maar maak dit regtig saak as ons uiterlike voorkoms dag na dag stadig besig is om te vergaan?

Ek glo dis die punt wat Petrus by die vroue in sy tyd probeer tuisbring het in 1 Petrus 3:4-5. Hulle het in die era van die Romeinse ryk geleef en in daardie tyd was vroue blykbaar baie behep met hulle hare. Glo dit of nie, maar hulle het toe ook al hare gekleur en hulle was lief daarvoor om pruike te dra, veral blonde pruike.

Nie dat daar enigsins iets verkeerd daarmee was nie. Petrus het nie gesê hulle mag nie so lyk nie. Hy het nie uiterlike versierings verbied, of gesê vroue mag nie hul hare mooi maak of juwele dra of mooi klere aantrek nie. Nee. Wat hy wel in sy brief aan medegelowiges probeer oordra het, is dat Christen-vroue se uiterlike versierings in matigheid behoort te wees. ‘n Christen-vrou se fokus en prioriteit behoort altyd op die versiering van die innerlike te wees, en nie die uiterlike nie. Vir Petrus was dít wat mense van buite af kon raaksien, nie ware skoonheid nie. Hy het ware skoonheid geag as dít wat van binne af uit kom: wie jy is, nie wat jy in ‘n spieël kan raaksien en optof nie.

In vandag se terme sou Petrus ook nie uiterlike versierings verbied het nie, maar hy sou wel by sy standpunt gebly en dit beklemtoon het dat ‘n vrou se mooiste eienskappe nie uiterlik van aard is. Haar innerlike versiering moet die bron van haar ware skoonheid wees:

Die onverganklike versiering van ‘n sagmoedige en stille gees….

Innerlike skoonheid is blywend. Niemand kan dit van jou af wegvat nie. Dit verouder nie. Dit kan nie vergaan of uitsterf nie. Inteendeel, onverganklike skoonheid raak net beter hoe ouer jy word. Soos goeie wyn; en goeie wyn het nie ‘n krans nodig nie, sê die spreekwoord. Innerlike skoonheid is baie meer waardevol as die dinge wat uiterlike skoonheid bevorder; en iets wat goed is hoef nie geprys te word nie.

Petrus beskryf die karakter van ware skoonheid as “‘n sagmoedige en stille gees”. Dit beteken om sag en vriendelik te wees. Beskeie. Om ‘n kalm en rustige gemoed te handhaaf. To be calm and self-controlled; not overanxious; but serene and spiritually mature (Amplified).

Dis ironies dat hierdie karaktertrekke nêrens vandag in ons kultuur aangemoedig of bevorder word nie…. En tog is dit baie kosbaar vir God.

Petrus se brief aan vroue duisende jare gelede, is vandag nog net so relevant. Ongeag die verskil in eras eeue uitmekaar, die beginsel staan vas soos God se Woord altyd vas bly staan: Mense oordeel volgens uiterlike voorkoms, maar die Here kyk na die binnekant.

Nie wat die mens sien, sien God nie, want die mens sien aan wat voor oë is, maar die Here sien die hart aan (1 Sam 16:7).

Hemelse Vader, ons kom voor U – nie net as vroue nie, maar ook as U dogters; en ons bring ook ons dogters en hulle dogters voor U. Gee dat ons nie spandabelrig sal wees en ons tyd en geld uitbundig sal spandeer op nuttelose en waardelose dinge nie; maar dat ons onsself sal beklee met die onverganklike wat die hart versier en ons sal mooi maak van binne af. Help ons om ons harte en ons denke in orde te kry en in lyn met U woord; sodat wanneer die versoekings ons wil oorval met gedagtes en begeertes na die maatstawwe van die wêreld daarbuite, dat ons die regte keuses sal maak. Amen

Versoekings lyk altyd aantreklik en mooi toegedraai in kortstondige beloftes van self-tevredenheid; self-liefde; self-voldaanheid; self-verheffing; self-bewondering…. Maar ons het nie hierdie dinge nodig om ons te klassifiseer nie. Die Here gee vir ons iets wat baie meer waardevol is; wat tydloos en onsterflik is: die onverganklike versiering vann sagmoedige en stille gees; en in Sy oë is dit die kosbaarste juwele wat ‘n vrou kan dra.

xxx

Amen & Koebaai

Ek kry vanoggend die stukkie op whatsapp en dit is so besonders. Mag dit vir iemand anders ook iets beteken xxx

Amen en koebaai…

Ek weet nie van jou nie, maar ek het twee soorte bid in my lewe: die een is sommer die gewone praat met God, geliefdes voor Sy voete lê, Hom aanbid vir Sy liefde en sorg, en dan opstaan en die dag voluit aanpak… En dan is daar die amen en koebaai bid. Daardie oggende wat jou bid nie woorde wil kry nie, en sommer net rou emosie is: verlang wat te veel word, vrees vir dinge wat wag, hartseer oor dinge wat gebeur het. En as mens so voor die Here ‘voel’, wil mens nie amen sê nie. Want amen voel partydae soos koebaai, so al asof jy en God julle eie koers gaan inslaan, tot die volgende gebed natuurlik. Op sulke dae klou jy wanhopig aan die Here vas, weet jy met kinderlike geloof dat die Here jou nie mag los nie. Nie op daardie oomblik nie. Nooit nie.

Iemand het eendag gesê dat mens soms moet bid, en ander kere net moet toelaat dat die Here jou liefhê… Op amen en koebaai dae, mag jy maar net stil by Hom sit en Hom vra om vir jou lief te wees. Op amen en koebaai dae, mag jy jou oë toemaak en in jou gedagtes voel hoe die Here jou styf vashou. Op amen en koebaai dae mag jy maar jou kop teen Sy bors laat sak, en jou huile huil. Op amen en koebaai dae maak dit nie saak of jy amen sê nie, want die Een wat jou naam in Sy handpalm geskryf het, het gesê: “Moenie bang wees nie (nie vir die hartseer van verlang na n geliefde nie, nie vir die spoke van die verlede of die uitdagings wat voorlê nie), want Ek is by jou. Altyd.”

Amen & Koebaai

Ek kry vanoggend die stukkie op whatsapp en dit is so besonders. Mag dit vir iemand anders ook iets beteken xxx

Amen en koebaai…

Ek weet nie van jou nie, maar ek het twee soorte bid in my lewe: die een is sommer die gewone praat met God, geliefdes voor Sy voete lê, Hom aanbid vir Sy liefde en sorg, en dan opstaan en die dag voluit aanpak… En dan is daar die amen en koebaai bid. Daardie oggende wat jou bid nie woorde wil kry nie, en sommer net rou emosie is: verlang wat te veel word, vrees vir dinge wat wag, hartseer oor dinge wat gebeur het. En as mens so voor die Here ‘voel’, wil mens nie amen sê nie. Want amen voel partydae soos koebaai, so al asof jy en God julle eie koers gaan inslaan, tot die volgende gebed natuurlik. Op sulke dae klou jy wanhopig aan die Here vas, weet jy met kinderlike geloof dat die Here jou nie mag los nie. Nie op daardie oomblik nie. Nooit nie.

Iemand het eendag gesê dat mens soms moet bid, en ander kere net moet toelaat dat die Here jou liefhê… Op amen en koebaai dae, mag jy maar net stil by Hom sit en Hom vra om vir jou lief te wees. Op amen en koebaai dae, mag jy jou oë toemaak en in jou gedagtes voel hoe die Here jou styf vashou. Op amen en koebaai dae mag jy maar jou kop teen Sy bors laat sak, en jou huile huil. Op amen en koebaai dae maak dit nie saak of jy amen sê nie, want die Een wat jou naam in Sy handpalm geskryf het, het gesê: “Moenie bang wees nie (nie vir die hartseer van verlang na n geliefde nie, nie vir die spoke van die verlede of die uitdagings wat voorlê nie), want Ek is by jou. Altyd.”

‘n Briefie…. van Leandri

Liefste tannie Andorize

Ek sê die volgende met ‘n swaar en dankbare hart.
Ek het gister oggend wakker geword en besef dat dit die 5de vieringsdaggie is van n persoon se lewe, wie ek herken, maar sekerlik nie meer ken nie. Ek het dit probeer verswelg, maar kon dit net eenvoudig nie reg kry nie. My hart breek, in duisende fyn stukkies, om te dink hoe tannie deur die dag gevoel het en selfs om te dink aan watter hartseer denke en onthou weer in tannie se gedagtes afspeel.

Ek haal voorwaar my hoed vir tannie af. Ek weet nie hoe tannie dit doen nie, bo dit alles leef tannie nog ‘n godgewende lewe met die goedheid en die seer. Dis waar, dat die wondere wat God aan ons beskryf werklik alle monsters uit ons harte dryf. Ek bid nog vir tannie, al die pad.
And I trust deeply that your sorrows will not last, and that happiness will always be found somewhere in every situation no matter how hard it is for us to find that happiness… I trust as proverbs 3:5 says “TRUST in the Lord”.

Groete aan my liewe Tannie Andorize.

18 vandag

My baba word vandag 18 jaar oud. 18. Tyd het gevlieg, Sus, jy word mondig vandag! Pragtige jong vrou in ‘n grootmens-wêreld. Ek wens ek kon jou hande vat en in jou oë kyk en self vir jou gelukwens.

Onthou wie jy is: ANIKE. Deur God gegee. ‘n Geskenk uit Sy hand. Dit is wat jou naam beteken en jou naam is in Sy handpalm gegraveer. Hy het jou nog nooit gelos nie; nog nooit alleen gelaat nie. Hy was elke tree saam met jou en dis juis daardie plekke waar jy die seerste het, waar Sy genade die grootste is. Onthou dit altyd, my kind. Jy kan jou ma eenkant toe gooi en verwyt vir alles wat verkeerd loop in jou lewe en maak of sy nie meer bestaan nie, maar God laat nie met Hom mors nie. Sy genade is oneindig groot en Sy liefde is onfeilbaar, maar ook net tot op ‘n punt. Ek weet, want ek het self Sy geduld beproef al ‘n paar maal in my lewe; en ek moes die gevolge dra.

Geen kind word met inherente haat gebore nie, Anike. Kinders word geleer om te haat, soos jy geleer is om te haat. Dis nie wie jy is nie. Ek ken jou, my kind, en dit is nie wie jy is nie. As jy maar weet hoeveel keer ek bid en vir die Here vra om vuur uit die hemel te laat kom! (Ek weet, ek besef nie altyd wat ek vra nie, maar ek vra in elk geval)…. Vir julle onthalwe. Vir julle behoud. Vir julle verlossing. Vir reg en geregtigheid. En vir my sanity. Want my kind, as my liefde vir julle nie genoeg was nie, wat sou my woorde in elk geval werd wees; as julle glo dat ek in elke opsig ‘n mislukking as julle ma is? Wat bly daar dan vir my oor? Ek het julle laat gaan omdat ‘n ma wat haar kinders onvoorwaardelik liefhet, hulle nie vashou as hulle nie wil bly nie. Toe julle wou gaan moes ek julle laat gaan want daar was vir julle beter moontlikhede op daardie stadium wat ek nie vir julle kon bied nie. Ek het julle uit liefde laat los en laat gaan. Let go and let God.

Ek sê hierdie dinge vir jou op jou mondigwording my skat, want vandag word jy ‘n grootmens, al is jy eintlik nog maar kind…. Dan moet mens begin dink en redeneer soos ‘n grootmens en die dinge van ‘n kind so stuk vir stuk agterlaat. Hierdie is realiteit. Harde realiteit. Ondersoek jouself. Wees op jou hoede en moenie saamgesleep word deur die stroom nie. PASOP om nie vasgevang te raak in ander mense se manier van dink nie. Moenie jou leefstyl aanpas by hulle gedragspatrone en dié van die wêreld nie. Onthou jou gunsteling psalm, Psalm 1. Leef daarvolgens. Moet jou nie bemoei met wat vir jou te groot of te moeilik is nie, maar onderskei wat HY wil hê dat jy moet doen: “naamlik dit werklik goed en aanvaarbaar en volmaak is” (Rom 12:2). Niks is op hierdie stadium van die geveg is meer belangrik as om met God reg te kom nie, want van hier af, my kind, kap jy jou eie pad oop en jy neem jou eie besluite en maak jou eie keuses. Anike-kind, jy kan dit nie sonder die Here doen nie. Jy gaan die pot baie ver mis sit as jy dink jou lewe kan sonder Hom bestaan. Dit kan nie. Vra my, ek weet. Ek was ook al daar en ek het nie net een keer nie, maar ‘n paar keer, die merk totaal gemis.

My wens vir jou, Sussa – nou dat die pad voor jou oop lê en jy wettiglik jou eie besluite kan neem en niemand meer ‘n sê of ‘n houvas oor jou het behalwe jy self nie (dank die Here daarvoor!) – dat jy sal soek en mag vind dít wat God vir jou lewe wil hê. Nie ek nie, nie ander mense nie, nie eers jyself nie, maar wat God wil hê vir jou. Laat Hy jou onderrig en die pad wys waarop jy moet gaan. Laat Hy jou Raadgewer wees. Onthou: sukses in vandag se taal beteken geld, aansien, die regte skole, die regte loopbaankeuses, die regte konneksies op jou pad…. Dit is alles goed en wel, maar op die lange duur, wanneer die ewigheid in sig kom, wat help dit as jy alles in die lewe het en alles in die lewe bereik, maar jou diepste menswees ly skade?

Mik vir dit wat God vir jou lewe wil hê, my kind. Do not settle for less! Jy weet dalk nie hoe so ‘n toekoms vorentoe mag lyk nie, maar God sê Hy weet wat Hy vir jou beplan: voorspoed en nie teëspoed nie. Saam met Hom wil ek ook hê dat jy hoop vir die toekoms moet hê (Jer 29:11) en jou toekoms, my kind, is nie beperk tot slegs een lewensduur nie. Nie net kan die Here vir jou deure oopmaak nie, Hy wil vir jou die hemel oopmaak! En daarom bid ek: Here, help my om te wil hê wat U vir my kinders wil hê. Help hulle om U bo alles lief te hê!

Anike, my kind, baie baie geluk met jou verjaarsdag. Jou tyd het aangebreek. Dis ‘n nuwe seisoen wat vir jou wag. Maak jou los van die dinge wat agter jou is en strek jou uit na dit wat voor is. Breek weg van die slegte en bou op die goeie. Daar is ‘n plan vir jou lewe en ek glo met my hele hart dat dit ‘n goeie plan is. Dinge sal vir jou uitwerk soos dit moet. Ek weet jy is braaf en dapper; gaan uit en gaan verower die wêreld. Jy was nog altyd ‘n vry gees. Moenie jou laat terughou nie. Gaan vind jouself opnuut; en volg jou hart na nuwe horisonne. En as die Here wil, mag jy jou pad terugvind huistoe. Maar as jy nie weer jou pad terugvind nie en ek jou nie weer sien in my lewe hier op aarde nie; as dit ons nie beskore is om te versoen voordat ek moet gaan nie, dan lê my hoop daarin dat ons mekaar wel in die hiernamaals sal sien waar daar geen trane en hartseer meer sal wees nie.

My tyd raak min, maar jou lewe lê voor. Gaan, en maak die beste daarvan. Ek sal altyd bitter trots wees op jou.

Here Jesus, waak asseblief oor hierdie kind van my. Lei haar weer na U toe. Ek weet nie wat U planne is vir haar nie, maar mag sy haar pad na U toe vind sodat sy altyd sal bly groei in U onverdiende goedheid en kennis. En terwyl ons van mekaar verwyder is, Here God, laat ons net aan U bly vashou. Wees vir ons ‘n skuilplek en beskerm ons van teëspoed. Bly in ons harte en maak ons dapper en sterk. Dankie dat U vir ons dinge uitwerk selfs al voel dit nie so nie. Dra ons dag na dag in U arms. Wat geen oog gesien het; wat geen oor gehoor het; wat in niemand se hart opgekom het nie – dit het God voorberei vir hulle wat Hom liefhet. Dit bid ek vir my kind op haar verjaarsdag.

Mooi dag, my liefste Anike-kind.

Al my liefde,

Mamma xxx

Sing, keteltjie, sing!!

Al is die ketel tot by sy nek in kookwater, sing hy steeds! Leef jou lewe, sing, en doen die moontlike. God sal die onmoontlike doen.

Elke dag – nie net sommige dae nie – maar elke dag laat ons toe dat vrese en beperkings en tekortkominge ons beheer. Ons bou rondom ons hierdie kraalmure waarbinne ons elke dag leef. En ons bly net tussen of agter hierdie mure met ‘n mentaliteit van “Ek kan nie”. As ons net kan besef dat daar lewe anderkant die mure ook is!! Ons hoef dit nie te sien nie, ons kan dit net weet; dat wanneer ons ons vertroue in die Here plaas, buite ons vermoë en begrip en krag en verstand; dít is wanneer geloof in werking tree. En wat is geloof anders dan as “‘n vaste vertroue op die dinge wat ons hoop, ‘n bewys van die dinge wat ons nie sien nie”.

Die lewe draai nie altyd uit soos ons dit wil hê nie. Myne het beslis nie. Dit het sy optes en aftes en draaie en kinkels. En dis juis hierin waar die water begin kook en die ketel begin sing. En hoe warmer die water raak, hoe harder sing hy. En hy hou nooit op met sing totdat die hitte minder raak en die water koeler raak nie.

Mag ons van iets so eenvoudig soos hierdie ketel leer; van Dawid en sy musiekleiers op snaarinstrumente, dat wanneer onheil dreig en gevare ons omring; wanneer dinge onseker is; wanneer mense ons verlaat of ons slegsê; wanneer die werk te veel raak; wanneer die kursus te moeilik raak; wanneer die huis te klein raak; en die bankrekening leeg raak…. “Nogtans sal ek jubel in die Here”.

Xxx

(Heb 11:1; Hab 3:18)

Geseënde Mamma’s dag!

Die mammas en oumas wat ek ken en wat ek so op my pad leer ken het almal een ding in gemeen: hulle lewe voluit en hulle demonstreer onvoorwaardelike, onselfsugtige liefde. It’s a God-thing.

IMG-20180513-WA0005

My ma was altyd daar vir my op my lewenspad. Haar liefde en gebede het my altyd terug gebring huistoe wanneer ek die pad byster geraak het. Terug na ons Hemelse Vader toe. Haar kinders en haar kleinkinders is haar alles, en sy sal haar alles gee vir ons.

IMG-20180513-WA0002

Ma, ek weet die pad wat jy gestap het was nie altyd maklik nie, maar Ma is vandag sterker ten spyte van daarvan. Deur voorspoed en teëspoed het Ma die persoon gebly wat haarself misken het ter wille van ons. Niks was ooit te swaar of te moeilik of te duur of te veel of te min nie. Uit niks het Ma alles gegee en gedoen. Met min het Ma ons deurgedra.

cc6ea88a79ef7659fd8a156d4725d795Geniet hierdie dag en elke dag, lief vir Ma ❤

IMG-20180513-WA0004

Dankie vir elke mamma en ouma wat so baie vir julle gesinne doen. Julle is super spesiaal!

IMG-20180513-WA0003

xxx